Mejlisde Oman Soltanlygynyň Ilçisi ynanç hatyny gowşurdy
2024-nji ýylyň 5-nji dekabrynda Türkmenistanyň Mejlisiniň Başlygy D.Gulmanowa Oman Soltanlygynyň Türkmenistandaky bellenilen Adatdan daşary we Doly ygtyýarly Ilçisi jenap Saif Bin Raşid Bin Saif Al-Jahwariden ynanç hatyny kabul etdi.
Milli Parlamentiň ýolbaşçysy Türkmenistanyň Prezidenti Serdar Berdimuhamedowyň adyndan Ilçini ýokary diplomatik wezipä bellenilmegi bilen gutlady. Ilçi Türkmenistanda öz ýurduna wekilçilik etmegiň uly hormatdygyny nygtady. Diplomat Garaşsyz, hemişelik Bitarap Türkmenistanyň içeri we daşary syýasatynyň esasy ugurlary hem-de milli Parlamentiniň işi bilen tanyşdyryldy.
Duşuşygyň barşynda iki ýurduň arasynda bar bolan dostlukly gatnaşyklary ilerletmekde döwletara we hökümetara hyzmatdaşlygyň strategik häsiýeti bellenildi. Söhbetdeşlikde söwda-ykdysady, medeni-ynsanperwer gatnaşyklary mundan beýläk-de ösdürmegiň uly mümkinçilikleri barada beýan edildi.
Şeýle hem Oman Soltanlygynyň Türkmenistanda bellenilen Adatdan daşary we Doly ygtyýarly Ilçisi Türkmenistanyň Daşary işler ministriniň orunbasary A.Gurbanow bilen duşuşdy.
Diplomatlar syýasy-diplomatik, söwda-ykdysady, nebit-gaz senagaty, oba hojalygy, dokma senagaty ýaly pudaklarda türkmen-oman gatnaşyklarynyň häzirki ösüş derejesini ara alyp maslahatlaşdylar şeýle hem diplomatlar Medeniýet günlerini, sergileri we beýleki çäreleri geçirmek möhümdigini belläp, medeni-ynsanperwer gatnaşyklary ösdürmegiň mümkinçiliklerini ara alyp maslahatlaşdylar.
