Türkmenistanda Wengriýanyň täze ilçisi resmi ýagdaýda öz işine başlady
12-nji sentýabr, penşenbe güni Wengriýanyň Adatdan daşary we doly ygtyýarly ilçisi Ýožef Roža Türkmenistanyň Mejlisiniň Başlygyna Dünýägözel Gulmanowa ynanç hatlaryny gowşurdy.
Milli Parlamentiň Başlygy Türkmenistanyň Prezidenti Serdar Berdimuhamedowyň adyndan diplomaty bu wezipä bellenilmegi bilen gutlap, oňa iki ýurduň arasynda dostlukly gatnaşyklary pugtalandyrmak işinde uly üstünlikleri arzuw etdi.
Ilçi Türkmenistanda öz ýurdunyň adyndan wekilçilik etmek onuň üçin uly hormatdygy barada belledi. Ýožef Roža Garaşsyz, Bitarap Türkmenistanyň içeri we daşary syýasatynyň ileri tutulýan ugurlary hem-de türkmen Parlamentiniň alyp barýan işi baradaky maglumatlary guzyklanma bilen diňledi.
Taraplar milli kanunçykaryjylyk ulgamyny kämilleşdirmek üçin tejribe alyşmakda uly mümkinçilikleriň bardygy hem-de Türkmenistanyň we Wengriýanyň arasyndaky hyzmatdaşlygy giňelmek meseleleri barada belläp geçdiler.
Şu gün Wengriýanyň täze ilçisi (hemişelik oturýan ýeri Daşkent ş.) Türkmenistanyň DIM-nde hem kabul edildi. Daşary işler ministriniň orunbasary Ahmet Gurbanow Ilçini onuň diplomatik missiýasyny amala aşyrmakda türkmen tarapynyň goldaw we hemaýat bermäge taýýardygynda ynandyrdy.
Söhbetdeşler esasy ugurlar boýunça ikitaraplaýyn gatnaşyklarynyň ösüş meselelerini ara alyp maslahatlaşdylar. Däbe öwrülen dostlukly we özara bähbitli gatnaşyklaryň ösdürilmeginde yzygider geçirilýän ýokary derejedäki duşuşyklaryň ähmiýetli orny barada bellenilip, söwda-ykdysady hyzmatdaşlygy pugtalandyrmak boýunça teklipler edildi diýip, DIM-niň habarlar gullugy belleýär.
ORIENT news
