Türkmenistanyň Halk Maslahatynyň Başlygy Gazagystanyň Prezidenti bilen duşuşdy
Gazagystanyň döwlet Baştutany V Çarwadarlaryň bütindünýä oýunlarynyň açylyş dabarasyna hut özüniň gatnaşýandygy üçin Gurbanguly Berdimuhamedowa öz minnetdarlygyny bildirdi.
Gazagystanyň Prezidenti Halk Maslahatynyň Başlygynyň Astana iş sapary bilen gelmegi ikitaraplaýyn hyzmatdaşlygyň mundan beýläk ösdürilmegi üçin uly ähmiýete eýedigini belläp geçdi. Häzirki gazak-türkmen gatnaşyklary üstünlikli ýagdaýda ösdürilip, strategiki hyzmatdaşlygyň derejesine doly laýyk gelýär diýip, “Akordy” habarlar gullugy Kasym-Žomart Tokaýewiň sözlerini getirýär.
Gurbanguly Berdimuhamedow däbe öwrülen myhmansöýerlik üçin öz hoşallygyny bildirip, şeýle uly sport ýaryşynyň üstünlikli geçirilmegini arzuw etdi. Türkmenistanyň Milli Lideri dünýä arenasynda ýurduň abraýynyň ýokarlandyrylmagyna mümkinçilik berýän iri halkara derejesindäki çäreleriň gurnalmagynda Astananyň ähmiýetli orny barada belläp geçdi.
Kasym-Žomart Tokaýew we Gurbanguly Berdimuhamedow söwda-ykdysady, energetika we ulag-logistika pudaklarynda ozal gazanylan ylalaşyklary ara alyp maslahatlaşyp, olaryň durmuşa geçirilmegine kanagatlanma bildirdiler.
Medeni we ynsanperwer gatnaşyklarynyň mundan beýläk pugtalandyrylmagyna aýratyn ähmiýet berildi.
Şeýle-de şu ýylyň oktýabr aýynda Gazagystanyň Prezidentiniň Türkmenistana amala aşyrjak iş saparynyň taýýarlyk işlerine garaldy.
ORIENT news
