Türkmen halkynyň Milli Lideri Çarwadarlaryň V bütindünýä oýunlarynyň açylyş dabarasynyň hormatly myhmany boldy
Astanada iş saparynda bolýan türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow şu gün V Çarwadarlaryň bütindünýä oýunlarynyň resmi açylyş dabarasyna gatnaşdy.
Özbegistanyň Prezidenti Şawkat Mirziýoýew, Gyrgyzystanyň Prezidenti Sadyr Žaparow, Tatarystan Respublikasynyň Raisi Rustam Minnihanow, Saha Respublikasynyň ýolbaşçysy Aýsen Nikolaýew, Mongoliýanyň öňki Prezidenti Nambaryn Enhbaýar, Bütindünýä etniki sport konfederasiýanyň prezidenti Bilal Erdogan, ÝUNESKO, Aziýada özara hyzmatdaşlyk we ynamy berkitmek çäreleri boýunça Geňeşi (CICA), Bütindünýä syýahataçylyk guramasy, Türki döwletleriň Guramasy, TÜRKSOÝ, Türki maýa goýum gaznasy ýaly halkara guramalarynyň ýolbaşçylary, şeýle-de Merkezi Aziýa boýunça Ýewropa Bileleşiginiň ýörite wekili we beýleki resmi wekiller “Astana Arena” stadionynda geçirilen çäräniň hormatly myhmanlarynyň arasynda boldular.
Dabaranyň başynda Gazagystanyň dürli etniki toparlaryna wekilçilik edýän çagalar Oýunlara eýeçilik edýän ýurduň baýdagyny çykaryp, döwlet gimni ýerine ýetirildi.
Soňra gatnaşyjy ýurtlaryň wekiliýetleriniň dabaraly ýörişi geçirildi. Bu ýylky Oýunlara Aziýanyň, Ýewropanyň, Demirgazyk we Günorta Amerikanyň, Afrikanyň we Awstraliýanyň türgenleri gatnaşýar.
Gazagystan Respublikasynyň Prezidenti Kasym-Žormart Tokaýew öz çykyşynda şeýle halkara ähmiýetli çärä gatnaşmak üçin Gazagystana gelen doganlyk ýurtlaryň liderlerine, ýokary derejeli myhmanlara we türgenlere öz hoşallyk sözlerini bildirdi.
Gazagystanyň döwlet Baştutanyň belleýşi ýaly, çarwa medeniýeti dünýä taryhynda öz öçmejek yzyny galdyrdy.
“Beýik çölüň çarwadarlary gadymyýetden bäri Ýewraziýada ýerleşýärdiler. Öz döwri üçin innowasion tehnologiýalaryna eýe bolmak bilen, olar ählumumy ösüşe öz täsirini ýetirdiler. Bäş müň ýyl mundan ozal çarwadarlar aty eldekileşdirip, bütin dünýä ýaýran çapyksuwarçylyk medeniýetini döretdiler. Çöl ussatlary ýaraglaryň öňdebaryjy nusgalaryny, ajaýyp şaý-seplerini döretdiler” – diýip, “Akordy” habarlar gullugy Tokaýewiň sözlerini getirýär.
Onuň aýtmagyna görä, Çarwadarlaryň oýunlary – ýaş nesiller üçin gymmatly mirasy goramak beýik maksady bilen ruhlanan özboluşly taslamadyr.
Dabaraly çäräniň dowamynda V Çarwadarlaryň bütindünýä oýunlarynyň Guramaçylyk toparynyň başlygy Roman Sklýar hem-de Bütindünýä etnik sport konfederasiýanyň prezidenti Bilal Erdogan dagy çykyş etdiler.
ORIENT news
