Karaçaýewo-Çerkesskiň uniwersitetinde daşary ýurtly talyplar üçin Magtymguly Pyragy adyndaky talyp haklary girizildi
U.D.Aliýew adyndaky Karaçaýewo-Çerkesskiň Döwlet uniwersitetinde daşary ýurtly talyplar üçin türkmen edebiýatynyň nusgawy şahyry Magtymguly Pyragy adyndaky talyp haklary girizildi. Bu barada Uniwersitetiň rektorynyň wezipesini ýerine ýetiriji Tausoltan Uzdenowyň sözlerine salgylanyp TASS habarlar agentligi habar berýär.
“Biziň ýokary okuw mekdebimizde köpsanly türkmenistanly talyplar okaýar. Beýik türkmen şahyry we akyldary Magtymguly Pyragynyň doglan gününiň 300 ýyllygy giňden bellenilýän şanly ýylynda biz daşary ýurtly talyplar üçin beýik şahyryň adyny göterýän talyp haklaryny girizdik” – diýip, T.Uzdenow agentlige habar berdi.
Uzdenow 10 müň rubl möçberindäki her aý boýunça tölenilýän talyp hakynyň okuwynda gowy ýetişýän hem-de jemgyýetçilik işlerine işjeň gatnaşýan iň ökde daşary ýurtly talyplara beriljekdigi barada belledi. Ilkinji şahadatnamalar tebigy geografiýa fakultetiniň magistri Altyn Bekmyradowa we filologiýa institutynyň aspiranty Ogulnar Töräýewa gowşuryldy.
U.D.Aliýew adyndaky Karaçaýewo-Çerkesskiň Döwlet uniwersitetinde her ýyl Türkmenistandan ýüzlerçe talyp ýokary bilim alýar. Olaryň köpüsi ählumumy Russiýa we halkara maslahatlarynyň gatnaşyjylary, sport ýaryşlarynyň ýeňijileri, Karaçaýewo-Çerkesskiň we Russiýanyň talyp durmuşynyň işjeň agzalary. Munuň bilen birlikde türkmen ýaşlary öz halkynyň köpasyrlyk däp-dessurlaryny ýatdan çykarman, ýokary okuw mekdebinde geçirilýän çärelerde köpçüligi Türkmenistanyň baý medeni taryhy bilen tanyşdyrýarlar.
ORIENT news
