Täjigistanda Türkmenistan bilen dostlugyny alamatlandyrýan täze mekdep açyldy
2024-nji ýylyň 1-nji sentýabry, Bilimler we talyp ýaşlar gününde, Täjigistan Respublikasynyň Hatlon welaýatynyň Dusti etrabynyň Ergeş Sultanow daýhan birleşiginde Magtymguly adyndaky umumybilim berýän orta mekdebiniň dabaraly açylyşy boldy. «Türkmenistan: Altyn asyr» döwlet elektron gazetinde habar berlişi ýaly, açylyş dabarasyna Türkmenistanyň Prezidenti Serdar Berdimuhamedow we Täjigistan Respublikasynyň Prezidenti Emomali Rahmon sanly ulgam arkaly gatnaşdylar.
Mekdebiň gurluşygy türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Täjigistanyň Prezidenti Emomali Rahmonyň başlangyjy esasynda guruldy. Türkmen gurluşykçylary tarapyndan bina edilen mekdep 540 okuwça niýetlenendir.
Mekdep häzirki zaman tehnologiýalary bilen enjamlaşdyrylyp, onda 24 synp otagy, kitaphana, sport zaly, uly mejlisler jaýy we naharhana bar. Açylyş dabarasynyň hormatyna Türkmenistanyň adyndan mekdebe 100 noutbuk kompýuteri we awtobus sowgat berildi. Prezident Emomali Rahmon öz çykyşynda beren goldawy üçin minnetdarlyk bildirdi we bu taslamanyň halklaryň arasyndaky medeni we ynsanperwer gatnaşyklary pugtalandyrmakdaky ähmiýetini belläp geçdi.
Türkmenistanyň Prezidenti Serdar Berdimuhamedow mekdebiň gurluşygy Türkmenistan bilen Täjigistanyň arasyndaky dostlugy we doganlygy alamatlandyrýandygyny, aýratynam täze mekdebiň adyny göterýän beýik türkmen şahyry Magtymguly Pragynyň doglan gününiň 300 ýyllygynyň ähmiýetini belledi.
ORIENT news
