Türkmenistan Singapurda bilim syýasatyny işläp taýýarlaýjy hünärmenleriň maslahatyna gatnaşdy
19-23-nji awgust aralygynda Günorta-Gündogar Aziýanyň şäher-döwletine saparynyň dowamynda Türkmenistanyň adyndan Milli bilim institutynyň uly ylmy işgäri O.Berdiýew “Bilim syýasatyny işläp taýýarlaýjy hünärmenler üçin bilimiň üýtgedilmegi: Singapuryň tejribesi” atly maksatnama boýunça halkara seminara gatnaşdy.
Bu barada Türkmenistanyň Bilim ministrligi habar berýär.
O.Berdiýewiň aýtmagyna görä, halkara seminaryň maksatnamasy baý many-mazmuna eýe boldy. Diňleýjiler Singapuryň bilim ulgamynyň öňünde duran wezipelerine laýyklykda meseleleri çözmekde hünärmenleriň tejribesine hem-de okuwçylaryň ygtyýarlyklarynyň döredilmegine we olaryň geljekde mekdepde üstünlikli okamaklary üçin şertleriň üpjün edilmegine gönükdirilen oňaýly netijeleri gazanmak maksady bilen bu ýurtda geçirilýän özgerişleri bilen tanyşdylar.
Singapuryň bilim ulgamyndaky hem-de bilim ulgamyny dolandyrmakdaky toplumlaýyn çemeleşmede häzirki zaman usullary, şeýle-de singapurly mekdeplerde bilim bermegiň hilini ýokarlandyrmaga we liderlige höwes döretmäge gönükdirilen syýasaty we innowasiýa tejribeleri derňeldi.
Trening tejribe alyşmagy, bilim edaralaryna baryp görmekligi, topar sapaklaryna gatnaşmaklygy öz içine aldy. Leksiýa berenleriň görkezme tanyşdyrylyşy örän giňişleýindi, netijeli çekişmeler geçirildi. Seminaryň netijesinde oňa gatnaşyjylara halkara nusgadaky şahadatnamalar gowşuryldy.
Singapuryň bilim ulgamy ýokary netijeliligi gazanyp, dünýä tarapdan ykrar edildi, ykjam häsiýete eýe bolup, ol ykdysadyýet düzümine uýgunlaşan. Singapurly mekdep okuwçylary halkara bilim synaglarynda yzygider iň gowy netijeleri görkezmegi başarýarlar.
Singapurda bilim ulgamynyň häzirkiz zaman ösüş tapgyrynyň esasy maksady her adamy durmuşyň dowamynda okamaga, täze bilimleri we endikleri öwrenmäge, täze tehnologiýalary özleşdirmäge, innowasiýalaryň ruhyny ösdürmäge höwes döredýän gurşawyň döredilmegi bolup durýar.
ORIENT news
