Türkmenistanyň Prezidenti Serdar Berdimuhamedow “Dragon Oil” kompaniýasynyň direktorlar Geňeşiniň Başlygyny kabul etdi
26-njy awgustda Türkmenistanyň Prezidenti Serdar Berdimuhamedow “Dragon Oil” kompaniýasynyň direktorlar Geňeşiniň Başlygy Saýed Al Taýýeri kabul etdi.
Duşuşygyň dowamynda bellenilişi ýaly, ýangyç-energetika pudagy Türkmenistan bilen Birleşen Arap Emirlikleriniň arasyndaky köptaraplaýyn hyzmatdaşlygynyň esasy ugurlarynyň biridir.
Döwlet Baştutany häzirki wagtda Türkmenistanyň nebit we gaz pudagynyň çalt depginde ösýändigini aýratyn belläp geçdi. Bu pudagyň strategiýasy ýurduň halk hojalygynyň zerurlyklarynyň üpjün edilmegine, şeýle-de ýerli çig malyň gaýtadan işlenilmeginiň esasynda onuň eksport mümkinçiliginiň ýokarlandyrylmagyna gönükdirilendir.
Serdar Berdimuhamedow Türkmenistan we BAE bu ugurda oňaýly hyzmatdaşlyk tejribesini toplandyklaryny belledi. Üstünlikli gatnaşyklarynyň hem-de Türkmenistanyň ýangyç-energetika toplumynyň ösüşi boýunça meýilleriň göz öňünde tutulmagy bilen, köp ýyllaryň dowamynda alnyp barylýan hyzmatdaşlygy giňeltmek mümkinçilikleri ara alnyp maslahatlaşyldy. Nebitiň we gazyň gazyp alynyşyny we gaýtadan işlenilişini, şeýle-de ýurduň energiýa serişdeleriniň hem-de taýyn nebit-gaz önüminiň eksportuny ýokarlandyrmak milli ykdysadyýetiň bu pudagynyň öňünde duran wajyp wezipedir.
Prezident türkmen tarapynyň arap kompaniýasynyň hyzmatdaşlygy mundan beýläk ösdürmek boýunça anyk tekliplerini ara alyp maslahatlaşmaga taýýardygyny belledi. Saýed Al Taýýer öz gezeginde, “Dargon Oil” kompaniýasyna bildirilen ynam üçin öz minnetdarlygyny aýdyp, hyzmatdaşlyk borçnamalaryny talabalaýyk ýerine ýetirmek üçin kompaniýa ähli tagallar eder diýip ynandyrdy. Bu barada “Watan” habarlar gepleşiginiň agşamky göýberilişinde habar beridli.
ORIENT news
