Türkmenistanda Kamboja Patyşalygynyñ täze Ilçisi bellenildi
Kamboja Patyşalygynyñ Adatdan daşary we Doly ygtyýarly ilçisi Sok Çea Türkmenistanyñ Mejlisiniñ Başlygy Dünýägözel Gulmanowa ynanç hatlaryny gowşurdy.
Duşuşyk duşenbe güni, 26-njy awgustda geçirildi. Ilçi ýurdumyzyñ içeri we daşary syýasatynyñ ileri tutulýan ugurlary, milli parlamentiñ düzümi we dürli ugurlarda durmuşa geçirilýän özgerişleriñ kanun çykarykylyk üpjünçiligi bilen tanyşdy. Mejlisiñ saýtynda habar berilişi ýaly, taraplar halkara parlament düzümleriniñ çäklerindäki gatnaşyklary işjeñleşdirmäge taýýardygyny bellediler.
Sok Çea Kamboja Patyşalygynyñ Türkmenistan bilen ähli ugurlar boýunça ikitaraplaýyn gatnaşyklaryny pugtalandyrmaga isleg bildirýändigini aýratyn belläp geçdi.
Şol gün Kambojanyñ ilçisi (hemişelik oturýan ýeri Ankara ş.) Türkmenistanyñ DIM-ne baryp, daşary işler ministriniñ orunbasary Mähri Bäşimowa bilen duşuşdy.
Diplomatlar halkara we sebit derejesinde, esasan hem BMG-niñ çäklerinde oñyn hyzmatdaşlyk tejribesini belläp, syýasy-diplomatik dialogynyñ ösüş mümkinçiliklerini ara alyp maslahatlaşdylar, şeýle-de bilelikdäki işewürlik maslahatlarynyñ we sergileriniñ geçirilmegi bilen söwda-ykdysady hyzmatdaşlygyny ýola goýmak meselelerine garadylar.
Türkmen DIM-niñ habarlar gullugynyñ habar bermegine görä, medeni we ynsanperwer gatnaşyklarynyñ giñeldilmegine, ylym, bilim, medeniýet we syýahatçylyk pudaklary boýunça tejribe alyşylmagyna gyzyklanma bildirildi.
Türkmenistan we Kamboja Patyşalygy 1995-nji ýylyñ 6-njy aprelinde diplomatik gatnaşyklary ýola goýdular. Kamboja Patyşalygyndaky (hemişelik oturýan ýeri Kuala-Lumpur ş.) Türkmenistanyñ Adatdan daşary we Doly ygtyýarly ilçisi Muhammetnyýaz Maşalowdyr (Malaýziýadaky Türkmenistanyñ Adatdan daşary we Doly ygtyýarly ilçisi). Ol 2023-nji ýylyñ awgustynda Kambojanyñ Patyşasyna ynanç hatyny gowşurdy.
Şeýle-de iki ýurduñ arasynda syýahatçylyk gatnaşyklaryny berkitmek üçin Türkmenistan bilen Kambojanyñ arasynda göni howa gatnawyny girizmek barada maslahatlaşyldy.
ORIENT news
