Astrahanda "Hazar möwsümleri" festiwalynda Türkmenistanyñ güni bellenildi
24-nji awgust, şenbe güni Astrahanda "Hazar möwsümleri" nusgawy sungat festiwalynyñ çäklerinde Türkmenistanyñ güni bellenildi.
Astrahan filarmoniýasynyñ sahnasynda biziñ ýurdumyzyñ saz sungatyny Türkmenistanyñ halk artisti wokal aýdymçysy Atajan Berdiýew, pianinoçy, milli we halkara ýaryşlaryñ ýeñijisi Aşyr Aşyrow hem-de "Aşgabadyñ kameratasy" kameraçy topary tanyşdyrdylar. Konsertiñ maksatnamasyna dünýä we milli nusgawy saz eserleri, meşhur aýdym repertuary girdi.
Çärä Russiýa Federasiýasyndaky Türkmenistanyñ Konsullygynyñ (Astrahan ş.) işgärleri, şäher dolandyryşyñ ýolbaşçylary, türkmen diasporasynyñ wekilleri, ýokary okuw mekdepleriniñ mugallymlary we talyplary, festiwalyñ myhmanlary we köpsanly astrahanly ýaşaýjylary gatnaşdy.
Mundan başga-da, Astrahan filarmoniýasynyñ girelge zalynda türkmen diplomatik edarasy tarapyndan Magtymguly Pyragynyñ doglan gününiñ 300 ýyllygyna bagyşlanylyp sergi gurnaldy.
Çärä gelen myhmanlar uly gyzyklanma bildirip, türkmen çeperçilik we zergärçilik sungat eserlerini, milli egin-eşiklerini, çeperçilik senet nusgalaryny synladylar. Sergide Magtymguly Pyragynyñ goşgularynyñ ýygyndylary, Gündogaryñ beýik akyldarynyñ ömrüne we döredijiligine bagyşlanylan ylmy neşirler, şeýle-de Türkmenistanyñ taryhyny, ösümlik we haýwanat dünýasini, syýahatçylyk aýratynlyklaryny beýan edýän ylmy-köpçülikleýin edebiýat eserleri görkezildi.
ORIENT news
