Golestanyň gubernatory: biz Türkmenistan bilen bilelikdäki erkin ykdysady zolagynyň döredilmegi barada maslahatlaşýarys
Şenbe güni Hökümet hepdeligi mynasybetli geçirilen Habar beriş serişdeleriniň maslahatynda Eýranyň demirgazyk welaýaty Golestanyň gubernatory Inçeburun erkin ykdysady zolagyndan söwda harytlarynyň eksportuna ygtyýarnamanyň berilendigi barada habar berip, şeýle belledi: “Biz Türkmenistan bilen bilelikdäki erkin ykdysady zolagynyň döredilmegi barada geňeşmeleri geçirýäris”.
IRIBnews maglumat agentliginiň habar bermegine görä, Ali Mohammad Zangane žurnalistlere Türkmenistan bilen serhetde ýerleşýän Inçeburun erkin ykdysady zolagy Merkezi Aziýa açylýan derweze bolup, bu ýerde geljekde 47 müň işçi orunlarynyň döredilmegi we 1600 senagat desgalarynyň gurulmagy göz öňünde tutulýar diýip belledi.
Inçeburunda bilelikdäki erkin ykdysady zolagynyň döredilmegi demir ýol bilen ýük aýlanyşygyny 13,7 mln tonna çenli, awtomobil ulag bilen – 6,3 mln tonna çenli artdyrar, diýip Eýranly gubernator nygtap geçdi.
Golestanyň gurbernatory logikstikany dolandyrmak, gaýtadan işleýän senagaty, nebit we himiýa pudagy hem-de syýahatçylyk we söwda bilen baglanyşykly meseleleri Inçeburun erkin ykdysady zolagynyň işewrülik merkezi diýip belledi.
Ykdysady meseleleri ugrukdyrmak boýunça Golestanyň gubernatorynyň orunbasary 2023-nji ýylda Türkmenistana bolan eýran eksportunda welaýatyň paýy 28 % barabar bolup, bu paýy 50 % çenli ýokarlandyrmak maksat edilýändigi barada habar berdi. Şeýle-de Inçeburun serhetýaka nokadyndan geçirilýän üstaşyr ýükleriň möçberi 1 mln tonnadan geçip, bu görkezijini ýakyn wagtda 1,2 mln tonna ýetirmek maksat edilýändigi barada bellenildi. Mundan başga-da, Golestanema sebit täzelikler saýtynyň maglumatlaryna görä, Gazagystana bolan welaýatyň eksport paýy öň 5 % deň bolan bolsa, geçen ýylyň ahyrynda 48 % barabar boldy.
ORIENT news
