Stambulda Türkiýe Respublikasynyň Halkara awtomobil gatnawlary assosasiýasynyň wekilleri bilen duşuşyk geçirildi
2024-nji ýylyň 16-njy awgustynda Türkmenistanyň Türkiýe Respublikasyndaky Baş konsuly M.Öwezow Türkiýe Respublikasynyň Halkara awtomobil gatnawlary assosasiýasynyň (UND) ýolbaşçylary bilen duşuşdy. Şeýle hem duşuşyga Türkmenistanyň Ulag-logistika merkeziniň wekilleri hem gatnaşdy.
Duşuşykda taraplar ulag we logistikany ösdürmek üçin täze innowasion çemeleşmeleri we sanly çözgütleri, tehnologiýalary ulanmak üçin täze mümkinçilikleri kesgitlemek, durnuklylygyny üpjün etmek, ulag infrastrukturasynyň hyzmatyny ösdürmek üçin ulag pudagynda halkara goldawyny giňeltmek we Türkmenistan bilen UND-iň arasyndaky gatnaşyklary güýçlendirmekligi ara alyp maslahatlaşdylar.
Tutuş dünýä üçin durnukly ulag aragatnaşygyny üpjün etmegiň zerurdygyny we derwaýysdygyny belläp, taraplar durnukly ulag ulgamynyň we Türkmenistanyň bu ugurda halkara başlangyçlarynyň durmuşa geçirilmeginiň ähmiýetine ünsi çekdiler.
Taraplar, şeýle hem sebitdäki üstaşyr gatnawynyň mukdaryny ýokarlandyrmakda iki ýurduň işjeň ornunyň ähmiýetini bellediler. Söhbetdeşler Türkmenistanyň halkara ulag ulgamlaryny düýpli kämilleşdirmek we ösdürmek bilen baglanyşykly ägirt uly mümkinçlikler barada bir meňzeş garaýyşlary beýan etdiler.
ORIENT news
