Hytaý Günorta-Hytaý deňzinde täze gaz ýataklaryň üstüni açdy
"China National Offshore Oil Corporation" (CNOOC) Günorta-Hytaý deňzinde möçberi 100 mlrd m3 barabar bolan tebigy gazyň ýataklarynyň üstüni açdy. TASS gullugynyň habar bermegine görä, bu barada South China Morning Post gazeti habar berdi.
Onuň berýän maglumatlaryna görä, bu açyş 2024-nji ýylyň iýun aýynda amala aşyryldy, bu hepde bolsa ýerli häkimiýetler kompaniýanyň arzasyna garap, gaz ýatagyny bellige aldylar. Oňa Lingshui 36-1 at goýlup, ol Haýnan adasyndan günorta-gündogarynda ýerleşýär. Bu ýerdäki deňziň ortaça çuňlugy 1,5 müň m barabar bolup, gaz käni deňiz düýbünden 210 m çuňlukda ýerleşendir.
Kompaniýa onýyllyklaryň dowamynda Günorta-Hytaý deňzinde nebit we gaz serişdeleriniň gözleg işlerini geçirdi. Birnäçe iri gaz ýataklar tapylyp, häzirki wagtda bu ýerdäki umumy subut edilen gazyň ätiýaçlyk gorlary 1 trillion m3 möçberinde artdy. Hytaý dünýäde tebigy gazyň iň iri import edijisi hasaplanylýar. 2023-nji ýylda ol umumy bahasy 64,3 mlrd $ barabar bolan bu ýangyjyň gaz halyndaky görnüşiniň hem-de suwaldylan tebigy gaz görnüşiniň 120 mln tonnasyny import etdi.
Hytaý Halk Respublikasyna turba geçirijiler arkaly gazyň iň iri üpjün edijileri bolup Türkmenistan, Russiýa we Mýanma çykyş etdiler. Şol bir wagtyň özünde Hytaý suwaldylan tebigy gazynyň iň köp mukdaryny Awstraliýadan, Katardan we Russiýa Federasiýasyndan import etdi.
