Isleseňiz – ynanyň, islemeseňiz – ynanmaň, ýöne wiktorinamyzyň 4-nji tapgyry iň soňky tapgyr bolar
Bu gezek hem “Şeýlelik bilen...” diýlen köpmanyly söz bilen başlalyň.
Şeýlelik bilen, “Eksport işi” atly akyl bäsleşiginiň soňky tapgyryna golaýlaşdyk.
Şeýle-de bolsa, synagçy-uçarmanlar, suw astynda ýüzýänçiler, harbylar we töwekgelçilik bilen bagly beýleki kärleriň wekilleri “soňky” diýlen sözi halamaýarlar. Belki, geňdirem, emma bu tutanýerli däp bilen baglanyşyklydyr.
Akyl bäsleşiginiň dowamynda köp zat üýtgäp durdy – soraglar, dalaşgärler, ýeňijiler... Üýtgemän galan ýeke zat – wiktorinaň özi bolup, ýylyň dowamynda ýuwaşlyk bilen, şol bir wagtda erjellik bilen özüniň soňuna golaýlaşýardy.
Şeýlelik bilen, bu gün, 3-nji awgustda, sagat 00:00-dan başlap, şol günüň sagat 24:00-a çenli, ýagny bir günüň dowamynda, bellige alnanlaryň iki dürli jogaby bolan 30 soraga jogap bermäge mümkinçiligi bolar. Jogaplaryň biri dogry jogapdyr.
Gepiň gerdişine görä, ýetişmedikler hem, bellige alnyp, ondan soňra gözrkezilen senäň soňky minudyna çenli soraglara jogap berip bilerler.
Bu gezekki gatnaşyjylarynyň arasyna ýurdumyzyň dürli welaýatlaryndan täze atlaryň goşulmagy hem begendirjidir.
“Eksporty ösdürmek” atly bölümimiziň maglumatlarynyň arasynda saklanylýan edebiýatlarda dogry jogap gözlemekde öz bilimlerini we başarnyklaryny barlap görüp, birnäçe gezek öz-özleri we bäsdeşleri bilen akyl söweşiniň ýoluna çykanlar hem haýran galýar.
Dolandyryjylaryň, işewür-seljerijileriň we eksport edýänleriň, şeýle-de mugallymlaryň, talyplaryň we mugallymlaryň arasynda biziň baý gorlarymyzyň yzarlaýjylary bardyr. Bu birleşige biraz öňüräk internet we tele-žurnalistler hem goşulyşdy. Umuman aýdylanda, üýtgeşik we edermen topar emele geldi.
Gadymy Gresiýada ýeňşi alamatlandyrýan "Nika" Hudaýy kimiň bagtyny çüwdürerkä? Oňa Gadymy Rimiň Wiktoriýa atly ýeňşiň Hudaýy hem laýyk gelýändir. Onuň ady bize örän ýakyndyr. Onuň sebäbi näme-kä?
Üç gezekden biljek boluň, ýöne munuň üçin sowgat ýa-da baýrak göz öňünde tutulan däldir.
Emma sowgatlary wiktorinamyzyň 4-nji tapgyrynyň ýeňijileri alarlar. Tutuş oýun boýunça rehimsiz ýöne adalatly emin agzalarynyň saýlan ýeňijisi arzyly baş baýragyň eýesi bolar.
Ony bolsa indiki hepdäniň Şenbe güni gowşurmak meýilleşdirilýär.
Ýene bir gezek ýatladýarys, “Eksport işi” – bu ORIENT saýtynyň hem-de USAID-iň Merkezi Aziýada söwda maksatnamasynyň bilelikdäki döreden "Eksport ekoulgamyny ösdürmek" başlangyjynyň çäklerindäki taslamasydyr.
Şeýlelik bilen, isleseňiz – ynanyň, islemeseňiz – ynanmaň, şunluk bilen akyl bäsleşigimiz özüniň işini tamamlaýar, gysgaça aýdanyňda bu tapgyr – akyl bäsleşigiň soňy!
Soňky... ýagny iň soöky bu tapgyrda ähliňize üstünlik arzuw edýäris!
Бекдурды АМАНСАРЫЕВ
