Çindaoda Ýaşyl ösüş boýunça ŞHG forumy geçirildi
Çindao şäherinde (Hytaýyň Şandun welaýaty) Ýaşyl ösüş boýunça Şanhaý Hyzmatdaşlyk Guramasynyň forumy geçirildi. Bu barada Hytaýyň halkara habarlar teleýaýlymy bolan CGTN dünýä ýüzündäki tomaşaçylaryna habar berdi.
Forum Hytaýyň Ekologiýa we daşky gurşaw ministrligi, ŞHG-nyň sekretariaty, ŞHG-nyň hoşniýetli goňşuçylyk, dostluk we hyzmatdaşlyk boýunça Hytaý komitetiniň sekretariaty we Şandun welaýatynyň Halk hökümeti bilen bilelikde guraldy. Forum, Hytaýyň ŞHG 2025-nji ýyla çenli dowam etjek başlyklygynyň çäginde guralan ilkinji çäre boldy.
Iki günüň dowamynda Hytaýdan we beýleki ýurtlardan 350 töweregi gatnaşyjylar daşky gurşawyň ösüşi, tehnologiki innowasiýa we howanyň üýtgemegine garşy göreş meselesini ara alyp maslahatlaşdylar. «Ýaşyl ösüşi bilelikde ösdürmek we adam bilen tebigatyň sazlaşykly ýaşamagyny öňe sürmek» atly mowzukda geçirilen forum ŞHG agza ýurtlarynyň arasyndaky hyzmatdaşlygyň çuňlaşmagyna we ýaşyl ösüş boýunça bilelikdäki tagallalara goşant goşdy.
Foruma gatnaşyjylara gutlag hatynda Hytaý Halk Respublikasynyň Başlygy Si Szinpin ekologiki gurşawy goramak we ýaşyl ösüşi öňe sürmek ŞHG agza ýurtlarynyň ylalaşygydygyny aýtdy. Şeýle hem, Hytaýyň «Şanhaý ruhuny» ösdürmek, agzybirligi we özara gatnaşyklary güýçlendirmek, ýaşyl ösüşi ösdürmek, umumy ösüşiň täze ugryny bilelikde döretmek we ŞHG bir bitewi ykbaly bolan has ýakyn jemgyýeti bilelikde gurmaga taýýardygy mälim etdi.
Forumyň dowamynda durnukly ösüş üçin «ýaşyl» hyzmatdaşlygy gurmak başlangyjy öňe sürüldi. Şeýle hem, gatnaşyjylar «2024-nji ýyl ŞHG ekologiýa ýyly», «Ýaşyl» we ýokary hilli ösüşi güýçlendirmek üçin tehnologiki innowasiýa» we «Az uglerodly özgerişler üçin howa hereketi» ýaly mowzuklar boýunça pikir alyşdylar.
ORIENT news
