BMG-niň Baş sekretary: Türkmenistanyň Bitaraplygy-- parahatçylygyň açary
BMG-niň Baş sekretary Antoniu Guterriş Türkmenistana resmi saparynyň dowamynda Türkmenistanyň Prezidenti Serdar Berdimuhamedow bilen duşuşdy. BMG-niň ýolbaşçysy Merkezi Aziýa üçin öňüni alyş diplomatiýasy boýunça sebit merkeziniň Aşgabatda ýerleşdirilendigi üçin hoşallyk bildirdi hem-de Türkmenistanyň alyp barýan bitaraplyk syýasatyna ýokary baha berdi.
“Türkmenistan halkara gatnaşyklarda, hususan-da, Birleşen Milletler Guramasy bilen hyzmatdaşlyga möhüm ähmiýet berýär. Häzirki çylşyrymly döwürde Türkmenistanyň Bitaraplygyna ýokary baha berýärin” diýip, Guterriş Aşgabatda žurnalistlere aýtdy.
Ol Türkmenistanyň öňe süren başlangyjy esasynda 2025-nji ýyly halkara parahatçylyk we ynanyşmak ýyly diýip, yglan edilmegi bilen gutlady.
Öňüni alyş diplomatiýasy
BMG-niň ýolbaşçysynyň belleýşi ýaly, BMG-niň Merkezi Aziýa üçin öňüni alyş diplomatiýasy boýunça sebit merkeziniň Aşgabatda döredilmegi guramanyň sebitiň bähbitlerine ygrarlydygyny görkezýär.
“Merkezi Aziýanyň ähli bäş ýurdunyň gatnaşmagynda Sebit merkezi mundan beýläk-de tagallalary birleşdirmek hem-de umumy çözgütleri işläp taýýarlamak, esasan-da, BMG-niň Merkezi Aziýada Ählumumy terrorçylyga garşy strategiýasyny durmuşa geçirmek hem-de ähli ilatyň bähbidine tebigy serişdeleri dolandyrmak babatynda umumy garaýyşlary kemala getirmek üçin forum bolup hyzmat eder” diýip, ol belledi.
“Men Türkmenistanyň halkyna uly üstünlikleri, ýurduň barha we barha köp adamlarynyň ösüşiň we abadançylygyň artykmaçlyklaryndan peýdalanyp bilmeklerini arzuw edýärin diýip, Guterriş metbugat öňündäki çykyşyny jemledi we – men Türkmenistanyň häzirki zaman halkara bileleşiginde parahatçylygyň hem-de bitaraplygyň möhüm merkezi bolup galmagyny arzuw edýärin” diýdi.
