China daily: Merkezi Aziýa ýurtlaryna syýahat edýän hytaýly jahankeşdeleriň sany barha artýar
Merkezi Aziýa ýurtlaryna syýahat edýän hytaýly jahankeşdeleriň sany barha artýar, diýip Hytaýyň iňlis dilinde neşir edilýän China daily gazeti habar berýär.
Şunda Gazagystan iň meşhur syýahat ugurlarynyň biridir. Ýurtlaryň arasynda wizasyz tertip hereket edýär.
Hytaýyň we Gazagystanyň raýatlaryna biri-biriniň ýurdunda bir gezeklik gelişde 30 güne çenli we 180 günüň dowamynda köp gezeklik gelişde 90 güne çenli bolmak rugsat berilýär.
Iýun aýynyň ortalarynda Sinszýan-Uýgur awtonom raýonyndaky China CYTS Tours Holding Co kompaniýasy Merkezi Aziýa ýurtlaryna syýahatçylyk gezelençlerini gurady. Ähli orunlar gysga wagtyň içinde öňünden sargyt edildi.
Utour syýahatçylyk agentliginiň marketing boýunça menejiri Li Mengranyň aýtmagyna görä, “Bir guşak – bir ýol” halkara hyzmatdaşlyk boýunça III forumyndan soňra Merkezi Aziýa ugry boýunça syýahatçylyga isleg artdy.
2023-nji ýyldan bäri Hytaý bilen Merkezi Aziýa ýurtlarynyň arasynda göni howa gatnawlary täzeden dikledilmäge başlady.
ORIENT news
