Lahoryň söwda-senagat edarasy Merkezi Aziýa ýurtlary bilen söwdany ösdürmegi maksat edinýär
28-nji iýunda Lahoryň söwda-senagat edarasynda (LCCI) Türkmenistanyň ilçihanasynyň işjeň gatnaşmagynda Merkezi Aziýa ýurtlary we Azerbaýjan bilen söwdany ösdürmäge ýardam bermek boýunça Kioskyň açylyş dabarasy boldy.
Dabara LCCI-niň ýolbaşçysy Kaşif Anwar, Türkmenistanyň, Azerbaýjanyň, Gazagystanyň we Gyrgyzystanyň ilçileri, Gazagystanyň we Gyrgyzystanyň hormatly konsullary, Lahoryň işewürlik jemgyýetçiliginiň hem-de ýerli köpçülikleýin habar beriş serişdeleriniň wekilleri gatnaşdylar.
Açylyş dabarasynda Türkmenistanyň ilçisi Atajan Mowlamow Pakistan bilen Merkezi Aziýa ýurtlarynyň arasynda söwda-ykdysady hyzmatdaşlygyň uly mümkinçilikleriniň bardygyny belledi diýlip ilçihananyň saýtynda habar berilýär.
Tebigy baýlyklarynyň uly gorlaryna eýe bolan Türkmenistan dürli ugurlarda Pakistan bilen söwda edip bilerdi diýip ilçi belledi. Meselem pakistan tüwini, şekeri, ulag serişdelerini, motosikilleri, ätiýaçlyk şaýlaryny eksport edýär, Türkmenistan bolsa öz gezeginde suwuklandyrylan gazy we nebit önümlerini iberip biler, hususyýetçileriň ugry boýunça hem hyzmatdaşlyk etmek üçin uly mümkinçilikler bar diýip ilçi belledi.
Kaşif Anwar energetika ulgamyndan başga-da, oba hojalyk pudagyny we dokma senagatyny geljegi uly ugurlaryň hatarynda belledi. Onuň pikirine görä, Merkezi Aziýa ýurtlary Pakistanyň dokma senagaty üçin çig maly iberip bilerler, öz gezeginde Pakistanyň oba hojalyk we dokma önümleri Merkezi Aziýanyň bazarlaryna iberilip bilner.
Ol Pakistanyň işewürleriniň Merkezi Aziýada pakistan harytlary we hyzmatlary üçin uly mümkinçilikleriň bardygyna düşünýändiklerini aýtdy. LCCI Kioskynyň açylmagy ýurtlarymyzyň arasyndaky ykdysady hyzmatdaşlygyň ösdürilmegine möhüm goşant bolup durýar diýip Kaşif Anwar belledi.
ORIENT news
