Türkmen wekiliýeti OPEK-iň Halkara ösüş forumyna gatnaşdy
2024-nji ýylyň 25-nji iýunynda Türkmenistanyň Prezidentiniň tabşyrygy boýunça Türkmenistanyň Döwlet daşary ykdysady iş bankynyň müdiriýetiniň başlygy OPEK-iň Halkara ösüş gaznasy tarapyndan Awstriýanyň Wena şäherinde guralan üçünji Ösüş forumyna gatnaşdy.
400-den gowrak wekili bir ýere jemlän Forumyň çäklerinde OPEK-iň Halkara ösüş gaznasynyň prezidenti jenap Abdulhamid Alhalifa bilen gepleşikler geçirildi. Gepleşikleriň dowamynda Türkmenistan bilen OPEK-iň Halkara ösüş gaznasynyň arasyndaky köpýyllyk hyzmatdaşlygy mundan beýläk-de ösdürmek we pugtalandyrmak meseleleri ara alnyp maslahatlaşyldy. Gepleşikleriň netijeleri boýunça Türkmenistanyň Prezidentiniň tabşyrgyna laýyklykda, Türkmenistan Hökümeti bilen OPEK-iň Halkara ösüş gaznasy arasynda «Ýurt bilen hyzmatdaşlyk etmek boýunça Çarçuwaly maksatnama» gol çekildi.
2024 – 2029-njy ýyllar aralygyndaky döwür üçin niýetlenen bu hyzmatdaşlyk hakynda Maksatnama köptaraplaýyn maliýe ösüş guramalary, şol sanda OPEK-iň Halkara ösüş gaznasy bilen ikitaraplaýyn hyzmatdaşlygy giňeltmäge gönükdirilendir. Ol aşakdaky ugurlary öz içine alýar: ulag, senagat, telekommunikasiýa, saglygy goraýyş, bank we maliýe hyzmatlary we beýleki pudaklarda ileri tutulýan taslamalara baha bermek we maliýeleşdirmek; ýurduň ilkinji «akylly» şäheri bolan Arkadag şäherinde tehnologiýa parklaryny, ylmy-gözleg merkezlerini, lukmançylyk merkezlerini we beýleki görnüşleri öz içine alýan infrastrukturany ösdürmek üçin maliýe we tehniki goldaw (grantlar) bermek; mükinçilikleri ýokarlandyrmak, bilim we tehnologiýa özgertmeleri üçin tehniki kömek bermek.
ORIENT news
