Bütindünýä gümrük guramasynyň Brýussel şäherindäki muzeýiniň gymmatlyklarynyň üsti Magtymgulynyň şekillendirýän haly bilen ýetirildi
17-nji iýunda Türkmenistanyň Belgiýadaky ilçisi Sapar Pälwanowyň Bütindünýä gümrük guramasynyň Baş sekretary Ýan Sondrs bilen duşuşygy boldy. Duşuşygyň dowamynda guramanyň muzeýine Magtymguly Pyragynyň keşbi çitilen el halysy gowşuryldy.
Bütindünýä gümrük guramasynyň Brýusseldäki ştab-kwartirasyndaky muzeýde gurama agza ýurtlaryň medeniýetini beýan edýän dürli sungat eserleri bar. Türkmenistan bu guramanyň işjeň agzasy bolmak bilen, bu medeni topluma öz goşandyny goşmagy möhüm hasaplady.
Türkmen diplomaty Türkmenistanyň baý medeni mirasyny we çeperçilik däplerini alamatlandyrýan bu halynyň ussat halyçylar tarapyndan 4 aýda dokalandygyny belledi. Şeýle hem ilçi öz eserlerinde dostlugy, edep-terbiýäni, parahatçylygy we hoşniýetli goňşuçylygy wasp edýän Magtymguly Pyragynyň öňe süren taglymlarynyň häzirki wagtda hem ähmiýetini ýitirmeýändigini nygtady. Halyda şeýle hem Türkmenistanyň sebitlerini alamatlandyrýan bäş göl ýerleşdirilipdir.
Guramanyň Baş sekretary muzeýe berlen sowgat üçin hoşallyk bildirip, halynyň nepisligine we medeni taýdan ähmiýetine ýokary baha berdi. Ol bu halynyň guramanyň binasyny bezejekdigini hem-de gelip-gidýänleri beýik şahyryň we filosofyň döredijiligini öwrenmäge ruhlandyrjakdygyny belledi.
Ýan Sondrs Magtymguly Pyragynyň döredijiligi bilen tanyşdygyny aýtdy we ony Uilýam Şekspir bilen deňeşdirdi hem-de medeni we edebiýat ähmiýeti babatda Şekspire deň derejede ähmiýetli şahsyýet hökmünde ykrar etdi.
Bu halynyň Bütindünýä gümrük guramasyna sowgat berilmegi bilen muzeýde türkmen medeniýetiniň sahypasy hem açyldy. Duşuşygyň ahyrynda Türkmenistan bilen guramanyň arasyndaky hyzmatdaşlygy mundan beýläk-de pugtalandyrmaga taýýarlyk beýan edildi.
ORIENT news
