BMG-niň Nýu-Ýorkdaky ştab-kwartirasynda Türkmenistanyň başlangyjy boýunça Bütindünýä welosiped gününe bagyşlanyp çäre geçirildi
3-nji iýunda BMG-niň ştab-kwartirasynda Bütindünýä welosiped güni mynasybetli dabaraly çäre geçirildi. Çäre Türkmenistanyň BMG-niň ýanyndaky hemişelik wekilhanasynyň başlangyjy boýunça Bahreýniň, Hindistanyň, Indoneziýanyň, Kataryň, Latwiýanyň, Rumyniýanyň, Türkiýäniň, Ekwadoryň BMG-niň ýanyndaky hemişelik wekilhanalary bilen bilelikde guraldy.
Bu çärä BMG-niň Baş Assambleýasynyň 78-nji sessiýasynyň başlygy Dennis Frensis, Baş sekretaryň ykdysady we durmuş meseleleri boýunça orunbasary Li Szýunhua, BMG-niň Nýu-Ýorkdaky işgärleriniň kärdeşler arkalaşygynyň başlygy Narda Kupidor, agza döwletleriň BMG-niň ýanyndaky hemişelik wekilleri we diplomatlary, BMG-niň Sekretariatynyň işgärleri gatnaşdylar.
Türkmenistanyň BMG-niň ýanyndaky hemişelik wekili Aksoltan Ataýewa çärä gatnaşyjylara hoşallyk bildirip, BMG-niň Baş Assambleýasynyň Bütindünýä welosiped güni atly kararnamasyny teklip eden ýurt hökmünde Türkmenistanyň welosiped ulagyny ilerletmek, ony milli aragatnaşyk ulgamyna girizmek ugrunda çykyş edýän hökümetleriň, guramalaryň we aýry-aýry şahsyýetleriň tagallalaryna ýokary baha berýändigini belledi.
Welosipediň ulanylmagyny höweslendirmek boýunça maksatnamalara döwlet býujetinden durnukly maliýeleşdirmegiň hem-de ulagyň ekologiýa taýdan bu arassa görnüşini goldamak boýunça uzakmöhletleýin maksatnamalary işläp taýýarlamagyň aýratyn ähmiýeti nygtaldy.
BMG-niň Baş Assambleýasynyň 78-nji sessiýasynyň başlygy we Baş sekretaryň ykdysady we durmuş meseleleri boýunça orunbasary, agza döwletleri jemgyýetde welosiped sürmek medeniýetini kemala getirmäge we höweslendirmäge çagyrdylar. Hususan-da, pyýadalaryň we welosiped hereketiniň howpsuzlygyny ýokarlandyrmak boýunça çäreleri amala aşyrmagyň, şeýle hem welosiped meselesini BMG-niň Baş Assambleýasynyň Türkmenistanyň başlangyjy boýunça kabul eden “Durnukly ösüşiň bähbidine köpçülikleýin welosiped sürmegi jemgyýetçilik ulag ulgamyny girizmek” Kararnamasyna laýyklykda, durnukly ösüş babatda halkara, sebit we milli maksatnamalara girizmegiň möhümdigi bellenildi.
2018-nji ýylda BMG-niň Ýewropa ykdysady komissiýasyna agza döwletleriň welosiped hereketini höweslendirmek boýunça Umumyýewropa baş meýilnamasynyň taslamasyny kabul edendikleri, Bütindünýä saglygy goraýyş guramasy tarapyndan birnäçe degişli maslahatlaryň işlenip taýýarlanylandygy, BMG-niň Daşky gurşaw boýunça maksatnamasy tarapyndan welosiped ulagynyň pandemiýadan soňraky “ýaşyl dikeldişiň” esasy komponentleriň biri hökmünde kesgitlenendigi aýratyn nygtaldy.
Şeýle hem welosiped ulagyny goldamak boýunça ählumumy meýilnamalary BMG-niň durnukly ulag boýunça 2026-2035-nji ýyllar üçin Onýyllygynyň “ýol kartasynyň” taslamasynda beýan etmegiň zerurdygy bellenildi.
Resmi dabara tamamlanandan soňra welosipedli ýöriş geçirildi.
