Dohada türkmen-katar syýasy geňeşmeleri geçdi
3-nji iýunda Doha şäherinde Türkmenistanyň we Katar Döwletiniň daşary işler ministrlikleriniň arasynda syýasy geňeşmeler geçdi. Türkmen wekiliýetine Türkmenistanyň daşary işler ministriniň orunbasary Ahmet Gurbanow, Katar wekiliýetine bolsa daşary işler döwlet ministri Sultan bin Saad Al-Muraihi ýolbaşçylyk etdi.
Geňeşmeleriň dowamynda döwletara gatnaşyklaryň häzirki ýagdaýy barada pikir alşyldy. Hususan-da, söwda-ykdysady, maýa goýumlary, syýahatçylyk, energetika we nebitgaz ulgamlaryndaky gatnaşyklary aýratyn üns berildi. Söwda-ykdysady hyzmatdaşlyk boýunça bilelikdäki türkmen-katar hökümetara toparynyň ähmiýeti bellenildi diýlip, DIM-niň metbugat gullugy habar berýär.
Taraplar şeýle hem parlamentara hyzmatdaşlygyny ösdürmegiň meselelerine degip geçdiler. Diplomatlar netijeli ikitaraplaýyn hyzmatdaşlygy ösdürmek boýunça tagallalary işjeňleşdirmegi ylalaşdylar. Şunda ýokary we iň ýokary derejelerde özara gatnaşyklary hem-de duşuşyklary dowam etmegiň möhümdigi bellenildi.
Köptaraplaýyn diplomatiýanyň, şol sanda BMG-niň çäklerinde hyzmatdaşlygyň yzygiderli ösdürilýändigine ünsi çekildi. Hyzmatdaşlygyň şertnamalaýyn-hukuk binýadynyň giňeldilmegi ileri tutulýan ugurlarynyň hatarynda kesgitlenildi.
Şunuň bilen birlikde, medeni-ynsanperwer hyzmatdaşlygy ilerletmegiň, şol sanda özara medeniýet günlerini, bilelikdäki sergileri geçirmegiň, bilim we sport ulgamlarynda hyzmatdaşlyk etmegiň wajypdygy bellenildi.
Duşuşygyň çäklerinde, şeýle hem sebit we halkara gün tertibiniň möhüm meseleleri ara alnyp maslahatlaşyldy.
ORIENT news
