Gruziýa BSG girmek babatda Türkmenistan bilen tejribe paýlaşýar
Şu hepde, 27-31-nji maý aralygynda Tiblisi şäherine saparynyň dowamynda Türkmenistanyň wekiliýeti Bütindünýä söwda guramasyna girmek boýunça gepleşikleri geçirmek babatda Gruziýanyň tejribesi bilen tanyşýar.
Türkmenistanyň wekiliýetiniň düzümine Maliýe we ykdysadyýet ministrliginiň, adalat ministrliginiň, merkezi bankyň, döwlet gümrük gullugynyň we beýleki edaralaryň wekilleri girdiler.
Saparyň dowamynda türkmen wekiliýeti Gruziýanyň Ykdysadyýet we durnukly ösüş ministrligindäki, daşary işler ministrligindäki, Salgyt gullugyndaky kärdeşleri, şeýle hem gümrük departamentiniň wekilleri bilen duşuşyklary geçirdiler.
Duşuşyklaryň dowamynda söwda-ykdysady ulgamyndaky ikitaraplaýyn gatnaşyklaryň esasy meselelerine seredildi hem-de Gruziýanyň BSG-a goşulmagy bilen baglanyşykly tejribesi öwrenildi. Mundan başga-da, BSG-a agzalygyň çäklerinde gümrük amallaryny döwrebaplaşdyrmak we ýönekeýleşdirmek, özgertmeleri geçirmek bilen baglanyşykly meselelere seredildi.
Türkmen wekiliýetiniň sapary dowam edýär.
Gruziýa 1996-njy ýylyň 3-nji iýulynda Bütindünýä söwda guramasyna girmek üçin ýüz tutdy. Gepleşikler 1999-njy ýyla çenli dowam etdi we 6-njy oktýabrda BSG-nyň baş geňeşi tarapyndan ýüz tutma makullanyldy. Gepleşik prosesiniň tiz geçendigi, beýleki agza ýurtlaryň kän-bir garşylyk görkezmändigi bellenildi. Aprel aýynda Gruziýanyň parlamentini gurama girmek baradaky Ähtnamany tassyklandan soňra, 2000-nji ýylyň 14-nji iýunynda Gruziýa BSG-niň 137-nji agzasy boldy. Şeýlelikde, ýurduň kabul edilmek prosesi 3 ýyl, 11 aý we 11 güne çekdi.
ORIENT news
