Türkmen wekilleri Belgiýada ÝB-niň daşary syýasaty boýunça tälim aldylar
Türkmenistanyň Daşary işler, Bilim, Maliýe we ykdysadyýet ministrlikleriniň, Türkmenistanyň Belgiýadaky ilçihanasynyň hem-de Daşary işler ministrliginiň Halkara gatnaşyklar institutynyň wekilleri 13-24-nji maý aralygynda Belgiýanyň Brýugge şäherinde geçirilen Merkezi Aziýanyň diplomatlary we resmi adamlary üçin Ýewropa Bileleşiginiň daşary syýasatynyň meseleleri boýunça guralan ýörite okuw maslahatyna gatnaşdylar.
Iki hepde dowam eden okuwa Gazagystandan, Gyrgyzystandan, Täjigistandan, Türkmenistandan we Özbegistandan 25 wekil gatnaşdy. Bu okuw maslahaty Ýewropa kolleji tarapyndan guraldy, Ýewropa Bileleşigi tarapyndan bolsa maliýeleşdirildi.
Okuw maksatnamasy boýunça oňa gatnaşyjylar ÝB-niň daşary syýasaty we howpsyzlyk syýasaty, şeýle hem ÝB-niň Merkezi Aziýa bolan gatnaşygy baradaky düşünjeler bilen tanyşdyryldy.
Okuw maslahatynyň sessiýalarynda dürli ugurlar, şol sanda ÝB-niň syýasatyndaky esasy syýasatçylar, ÝB-niň institutlary we çözgüt kabul etmek prosesleri, şeýle hem Ýewropa Bileleşigi bilen gepleşikleri geçirmegiň strategiýalary barada giňişleýin durlup geçildi diýip, Türkmenistanyň ilçihanasynda habar berdiler.
Ýörite okuw sapaklary hem-de ÝB agza döwletleriň arasyndaky gepleşikleri gaýtalaýan okuw sapaklary gatnaşyjylara tejribesini baýlaşdyrmaga, Ýewropa kollejiniň rektory hem-de ÝB-niň ozalky ýokary wezipeli diplomaty Federika Mogerini bilen kaminiň başyndaky söhbetdeşlikler Ýewropa ýurtlarynyň diplomatiýasy baradaky gymmatly maglumatlary almaga mümkinçilik berdi.
Şeýle hem maksatnamada Brýussel şäherine okuw sapary we oňa gatnaşyjylaryň tejribesini baýlaşdyrmak üçin sosial-medeni çäreler göz öňünde tutuldy.
Görnükli spikerleriň hatarynda 2014-2019-njy ýyllarda Ýewropa komissiýasynyň daşary işler we howpsuzlyk syýasaty boýunça ýokary wekili, wise-prezidenti, 2014-nji ýylda Italiýanyň daşary işler we halkara hyzmatdaşlygy ministri wezipelerinde işlän Federika Mogerini, ÝB-niň Merkezi Aziýa boýunça ýörite wekili Teri Hakala hem-de ÝB-niň sanksiýalar boýunça ýörite ilçisi Dewid O’ Salliwan bar.
Okuw sapagynyň açylyş hem-de ýapylyş dabaralaryna Federiki Mogorini hem-de Ýewropanyň daşary gatnaşyklar gullugynyň resmi adamlary bilen birlikde Türkmenistanyň Belgiýadaky ilçisi Sapar Pälwanow hem gatnaşdy.
Merkezi Aziýanyň wekilleriniň arasynda diplomatik gatnaşyklary pugtalandyrmak hem-de ÝB-niň syýasatyny düşündirmek okuwyň esasy maksady boldy. Munuň özi Ýewropa Bileleşigi bilen netijeli hyzmatdaşlyga ýardam berer.
ORIENT news
