Türkmenistanyň GFR-däki konsullygynda «Messe Frankfurt» kompaniýasynyň sebitleýin direktory bilen duşuşyk geçirildi
GFR-niň Maýnyň boýundaky Frankfurt şäherinde ýerleşýän Türkmenistanyň konsullygynda konsul Myrat Özbekbaýew bilen «Messe Frankfurt» kompaniýasynyň Aziýa, Merkezi Aziýa we Günorta Amerika ýurtlary boýunça sebitleýin direktory Ýurgen Wersiň arasynda duşuşyk geçirildi.
21-nji maýda, sişenbe güni geçirilen duşuşygyň dowamynda «Messe Frankfurt» kompaniýasynyň Türkmenistan bilen köp ýyllyk hyzmatdaşlygynyň çäklerinde ozal durmuşa geçirilen bilelikdäki çäreler, gol çekilen ikitaraplaýyn resminamalar barada pikir alşyldy we özara gatnaşyklaryň geljegi uly ugurlary ara alnyp maslahatlaşyldy.
Hususan-da, Frankfurt ýarmarkasynyň wekili sergi işiniň dürli ugurlarynyň çäklerinde türkmen tarapy bilen gatnaşyklary ösdürmäge gyzyklanma bildirdi. Şunuň bilen baglylykda, «Messe Frankfurt» kompaniýasynyň şu maksatlar bilen 2019-njy ýylda Aşgabatda resmi wekilhanasyny açandygy bellendi.
Duşuşykda taraplar Türkmenistanyň gyzyklanma bildirýän döwlet edaralaryny we hususy pudagynyň wekillerini çekmek maksady bilen, «Messe Frankfurt» tarapyndan şu ýyl Frankfurtda we daşary ýurtlarda guraljak iri ýöriteleşdirilen sergileriň meýilnamasyny gözden geçirdiler. Şeýle hem Frankfurt ýarmarkasy bilen baglylykda bilelikdäki çäreleri geçirmegiň mümkinçilikleri barada pikir alyşyldy diýip, türkmen konsullygy habar berýär.
«Messe Frankfurt» öz sergi toplumy bolan, sergileri, kongressleri we çäreleri guraýan dünýäniň iň iri kompaniýasydyr. Frankfurt sergi toplumy 584 müň inedördül metr meýdany eýeleýär we 11 pawilýonda ýerleşýär. Frankfurt ýarmarkasynyň söwda sergileriniň, kongressleriniň we beýleki çäreleriniň maksatnamasy örän giňdir – ol awtoulag senagatyndan logistika, dokma pudagyndan aýdym-saz ulgamyna, energiýa tygşytlylygyndan howpsuzlyga çenli dürli ugurlary öz içine alýar.
ORIENT news
