Belarus EYZ-nyň kärhanalarynyň Türkmenistana eksporty iki esse artdy
Belarus Respublikasynyň erkin ykdysady zolaklarynyň wekilleri 2024-nji ýylyň birinji çärýeginde harytlarynyň Türkmenistana eksportyny 2,1 esse artdyrdylar.
Belarus EYZ-nyň kärhanalarynyň eksportynyň ösüşinde Türkmenistan ikinji orny eýeledi, birinji orunda bolsa Yrak ýerleşdi – bu ýurda eksportyň ösüşi 4,5 esse boldy. Belarus Respublikasynyň EYZ-nyň wekilleri Aziýanyň beýleki ýurtlaryna: Gazagystana, Hindistana, Täjigistana, Hytaýa we Türkiýä hem iberilýän önümleriniň möçberlerini artdyrdylar.
Umuman alanyňda, 2024-nji ýylyň birinji çärýeginde Belarus Respublikasynyň EYZ-den önümleriň eksportynyň jemi bahasy 2,1 milliard dollara barabar boldy – bu EYZ-niň tutuş taryhynda ýylyň birinji çärýek üçin rekord görkezijidir diýip, Belarusyň Ykdysadyýet ministrliginiň metbugat gullugy habar berdi.
Soňky ýyllarda Belarusyň Türkmenistana eksportynyň esasyny şeker, teker, izolýasiýa simleriniň, derman serişdeleriniň we süýt önümleriniň üpjünçiligi düzýär.
Golaýda Aşgabatda geçirilen azyk önümçiliginiň döwrebap tehnologiýalarynyň «Agro Pack Turkmenistan & Turkmen Food» atly halkara sergisinde Belarus Respublikasyna «Bellakt» AGPJ wekilçilik edip, köp sanly önümlerini görkezdi: çaga iýmiti, doragly süýjülikler, süýt önümleri: şüle, ýogurt, kokteýller, dorag we beýlekiler. «Bellakt» AGPJ-niň wekilleri täze hyzmatdaşlar bilen gepleşikleri geçirdiler we birnäçe önümçilik kärhanalaryna baryp gördüler diýip, Belarusyň ilçihanasy habar berýär.
Belarusyň Daşary işler ministrliginiň berýän maglumatlaryna görä, Türkmenistanda Belarus kärhanalarynyň we guramalarynyň haryt paýlaýyş ulgamynyň 10-dan gowrak wekili işleýär. Belarusyň Türkmenistandan import edýän esasy önümleri ýorgan-düşek we aşhana üçin niýetlenen dokma önümleri, gap-gaçlar we plastmassadan öndürilen hojalyk serişdeleri, dokma serişdelerinden taýýarlanan haltalar we gaplaýyş torbalary, dokma däl matalar, dokma egin-eşiklerdir.
ORIENT news
