Türkmenistanyň Russiýadaky ilçisi Federasiýa Geňeşiniň başlygynyň orunbasary bilen duşuşdy
Türkmenistanyň Russiýa Federasiýasyndaky ilçisi Esen Aýdogdyýew 20-nji maýda duşenbe güni Federasiýa Geňeşiniň Başlygynyň orunbasary Konstantin Kosaçýow bilen duşuşdy.
«Senatorlar şeýle duşuşyklaryň yzygiderli geçirilmegine we iş tertibine girizilmegine gyzyklanma bildirýärler. Diplomatik wekiller bilen gatnaşyklar parlamentara işjeňligine goşant goşýar» diýip, Federasiýa Geňeşiniň başlygynyň orunbasary belledi. Ol Russiýanyň parlamentarileriniň türkmen kärdeşleri bilen dialogy pugtalandyrmak we ösdürmek bilen, Türkmenistan bilen gatnaşyklaryň häzirki ýagdaýyna hem-de ony ösdürmäge uly üns berýändiklerini aýtdy.
Konstantin Kosaçýow Russiýanyň Yslam Hyzmatdaşlyk Guramasynyň işlerine işjeň gatnaşýandygyny we musulman döwletleri bilen gatnaşyklary giňeltmäge synanyşýandygyny ýatlatdy. Ol Türkmenistanyň «Russiýa – Yslam dünýäsi» formatyna goşulyşmagyny mübärekledi.
«Biz Russiýanyň we Türkmenistanyň parlamentleriniň baştutanlary derejesindäki yzygiderli duşuşyklaryň, şeýle hem Merkezi Aziýa ýurtlarynyň we Russiýanyň parlamentara hyzmatdaşlygynyň täze meýdançasy bolan Aşgabat formatynyň çäklerindäki gatnaşyklaryň ösdürilmegine goşmaça itergi bermäge synanyşarys» diýip, Kosaçýow aýtdy.
Esen Aýdogdyýew türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň Federasiýa Geňeşi bilen gatnaşyklary işjeňleşdirmegi tabşyrandygyny aýtdy. Diplomat türkmen-rus parlamentara hyzmatdaşlygynyň mundan beýläk-de ösdürilmegine goldaw bermek isleg bildirýändigini aýtdy.
Söhbetdeşligiň dowamynda Federasiýa Geňeşiniň Başlygynyň orunbasary Konstantin Kosaçýowyň Türkmenistanyň Halk Maslahatynyň Başlygy Gurbanguly Berdimuhamedow bilen Kazanda geçirilen duşuşygynyň meseleleri ara alnyp maslahatlaşyldy diýip, Türkmenistanyň Russiýanyň Federasiýasyndaky ilçihanasy habar berýär.
ORIENT news
