Türkmenistanda sanly ýer kadastrynyň döredilmegi dowam edýär
Türkmenistanda sanly Döwlet ýer kadastrynyň – ýerleriň döwlet hasaba alyş işleriniň dowamynda toplanan maglumatlaryň jemini, olaryň mukdaryny we hilini, ykdysady bahalandyrmasyny, şeýle hem ýer baýlyklarynyň, ekin meýdanlarynyň netijeli we tygşytly ulanylmagyna gözegçilik etmek üçin toplanan maglumatlary öz içine alýan bitewi elektron ulgamynyň döredilmegi dowam edýär.
17-nji maýda, anna güni geçirilen türkmen Hökümetiniň mejlisinde habar berlişi ýaly, bugdaý ekilen meýdanlaryň möçberi, olaryň ýerleşýän ýerleri hem-de kärendeçiler we peýdalanyjylar baradaky maglumatlar eýýäm ýer kadastrynyň maglumatlar binýadyna doly girizildi.
Gowaça, gök-bakja we beýleki oba hojalyk ekinleri üçin bölünip berlen ýerler baradaky degişli maglumatlary kadastra girizmek we ony has-da kämilleşdirmek boýunça degişli işler alnyp barylýar.
Döwlet ýer kadastrynyň ykdysady ähmiýeti bardyr we ol ýerden netijeli peýdalanylmagyny guramaklyga hem-de ony goramaklyga, hojalygy meýilnamalaşdyrmaklyga, oba hojalygyk önümçiligini ýerleşdirmeklige we ýöriteleşdirmeklige, ýerleriň şorlaşmagynyň öňüni almaklyga, ýer böleklerine hukuklary kepillendirmeklige we beýleki maksatlara gönükdirilendir.
ORIENT news
