Belgiýada Merkezi Aziýanyň diplomatlary üçin ÝB-niň bilim maksatnamasy işe girizildi
Belgiýanyň Brýugge şäherinde möhüm çäre bolup geçdi: Ýewropa kolleji tarapyndan Ýewropanyň daşary hereketler gullugynyň goldawy bilen täze bilim maksatnamasy işe girizildi. Merkezi Aziýanyň ýaş diplomatlaryna gönükdirilen bu maksatnama sebitleriň arasyndaky bilim we diplomatik gatnaşyklary berkitmek üçin döredildi.
Bu maksatnama Ýewropanyň öňdebaryjy bilim edaralarynyň gatnaşmagynda işlenip düzüldi we Ýewropa Bileleşiginiň institutlarynyň işini öwrenmegiň çäklerinde gatnaşyjylar üçin iki hepdelik okuwy öz içine alýar. Bu başlangyjyň esasy maksady diňe bir özara düşünişmegi ösdürmek bilen çäklenmän, eýsem, ÝB bilen Merkezi Aziýa ýurtlarynyň arasyndaky hyzmatdaşlygyň gurallaryny çuňlaşdyrmakdan ybaratdyr.
Açylyş dabarasynda Türkmenistanyň ÝB-däki ilçisi Sapar Pälwanow çykyş edip, sebitara gatnaşyklary pugtalandyrmagyň häzirki şertlerinde bu maksatnamanyň möhüm ähmiýetini nygtady. Ilçiniň bellemegine görä, taryhyň bu döwri täze hyzmatdaşlyk mehanizmlerini döretmek we pugtalandyrmak üçin amatlydyr. Şeýle hem ilçi Türkmenistanyň bu maksatnamany goldamagy we mundan beýläk-de ösdürilmegine goşant goşmagy dowam etdirmäge taýýardygyny aýtdy.
Çärede bilim maksatnamalarynyň geljegi we diplomatik gatnaşyklaryň ösmegindäki orny barada pikir alyşyldy. Ýewropa kollejiniň direktory (Ýewropa diplomatiýasynyň ozalky başlygy) Federika Mogerini we Ýewropanyň daşary hereketler gullugynyň sebit direktory Lýuk Dewin bilen geçirilen gepleşiklerde hyzmatdaşlygyň giňeltmegiň mümkinçilikleri we garaşylýan netijeler ara alnyp maslahatlaşyldy.
Bu başlangyç Merkezi Aziýa bilen Ýewropa Bileleşiginiň arasyndaky bilim we medeni gatnaşyklary çuňlaşdyrmakda, medeni alyş-çalşy ösdürmekde we sebitleriň arasyndaky diplomatik gatnaşyklary pugtalandyrmakda möhüm ädim bolar.
ORIENT news
