Türkmenistanyň DIM-niň Halkara gatnaşyklary instituty tarapyndan yglan edilen halkara esse bäsleşiginiň ýeňijileri yglan edildi
Türkmenistanyň DIM-niň Halkara gatnaşyklary instituty tarapyndan Merkezi Aziýa ýurtlarynyň ýokary okuw mekdepleriniň talyplarynyň arasynda yglan edilen “Dünýäde parahatçylygy we howpsuzlygy üpjün etmekde halkara ynsanperwer hukugynyň ähmiýeti” temasy boýunça halkara esse bäsleşiginiň jemleri jemlenildi.
Bäsleşikde birinji orna Halkara ynsanperwer ylymlary we ösüş uniwersitetiniň talyby Merdan Çaryýew, Magtymguly adyndaky Türkmen döwlet uniwersitetiniň talyby Nurana Rejepgulyýewa hem-de Gyrgyz Respublikasynyň DIM-niň K.Dikambaýew adyndaky Diplomatik akademiýasynyň talyby Adeli Raimkulowa mynasyp boldylar.
Ikinji orny birbada 5 talyp – M.Garryýew adyndaky Türkmenistanyň Döwlet lukmançylyk uniwersitetiniň hem-de Türkmenistanyň DIM-niň Halkara gatnaşyklary institutynyň, Täjigistanyň Milli uniwerstitetiniň, Gazagystanyň Al-Farabi adyndaky milli uniwersitetiniň we Daşkentdäki Dünýä ykdysadyýeti we diplomatiýasy uniwersitetiniň talyplary eýelediler.
3-nji ýere bolsa 8 talyp mynasyp boldy. Olaryň hatarynda Türkmen döwlet maliýe institutynyň, Türkmenistanyň Döwlet energetika institutynyň, Türkmenistanyň IIM-niň institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň DIM-niň Halkara gatnaşyklary institutynyň, Täjigistanyň Milli uniwerstitetiniň talyplary bar.
Eminler agzasy bäsleşige gatnaşyjylaryň Halkara ynsanperwer hukugy babatdaky bilimlerine, pikirleriň özboluşlylygyna, ýerine ýetirilen işiň mazmunynyň tema laýyk gelmegine we beýan edilişiň hiline baha berdi.
ORIENT news
