Türkmenistan Minsk şäherinde geçirilen ulag-logistika maslahatyna gatnaşdy
Foruma gatnaşyjylar GDA ýurtlary bilen Hytaýyň arasynda netijeli demirýol daşamalary ulgamyny ýola goýmak meselelerini ara alyp maslahatlaşdylar.
Türkmenistanyň wekiliýeti 4-nji aprelde Belorussiýanyň paýtagty Minsk şäherinde geçirilen «2024. Demirýol logistikasy: ösüşiň möhüm wezipeleri» atly halkara maslahata gatnaşdy. Çäre Belorussiýanyň demirýol edarasy tarapyndan guraldy.
Şeýle hem forumy guraýjylar Russiýadan, Azerbaýjandan, Gyrgyzystandan, Gazagystandan we Hytaýdan wekiliýetleri çagyrdylar. Maslahata Belarusyň ugurdaş ministrlikleriniň, edaralarynyň we logistika kompaniýalarynyň, «Beýik daş» Hytaý-Belarus senagat parkynyň, portlaryň wekilleri hem-de ulag düzümleriniň eýeleri gatnaşdylar.
Maslahatda Türkmenistana «Demirýollary» AGPJ-niň baş direktorynyň orunbasary Allaguly Hudaýberdiýew, «Demirýollary» AGPJ-niň 20-nji şahamçasynyň başlygy Maksat Rejepow, «Türkmenistanyň ulag-logistika merkezi» AGPJ-niň baş direktorynyň orunbasary Arslan Gurbanow, «Türkmenistanyň ulag-logistika merkezi» AGPJ-niň Russiýa Federasiýasyndaky wekili Wladimir Tahiýew wekilçilik etdiler diýlip, «Demirýollary» AGPJ-niň saýtynda habar berilýär.
Maslahatyň çäklerinde oňa gatnaşyjylar GDA-nyň giňişliginde ulag logistikasyny emele getirmegiň, demirýollaryň we deňiz portlarynyň gatnaşmaklarynda bäsdeş logistiki çözgütleriň döredilmeginiň mümkinçiliklerini seljerdiler.
Forumyň gün tertibinde demirýol ulgamlarynyň we logistika kompaniýalarynyň ulag-üstaşyr mümkinçilikleri, «Demirgazyk – Günorta» we «Gündogar – Günbatar» ulag geçelgeleri boýunça ýük daşamalaryny guramak, şeýle hem «Bir guşak, bir ýol» başlangyjyny durmuşa geçirmek bilen baglanyşykly meseleler girizildi.
ORIENT news
