Katardaky türkmen ilçisiniň ahalteke bedewlere bagyşlanan makalasy çap edildi
Türkmenistanyň Katar döwletindäki ilçisi Myratgeldi Seýitmämmedow meşhur arap gazetleriniň biri bolan «Al Sharq» gazetinde türkmen halkynyň buýsançy – ahalteke bedewlerine bagyşlanan makalasyny çap etdi.
Makala her ýyl aprel aýynyň soňky ýekşenbesinde ýurdumyzda bellenilýän Türkmen bedewiniň gününiň öňüsyrasynda çap edildi.
Öz makalasynda diplomat seýisçilik sungatynyň türkmen halkynyň durmuşyndaky aýratyn ornuny, her bir türkmenistanlynyň ahalteke bedewine bolan hormatyny nygtaýar. Seçgiçi seýis Aba Annaýewiň Türkmenistanda atşynaslygy ösdürmekde goşan goşandy bimöçberdir.
Diplomat atçylyk ulgamynda Türkmenistan bilen Kataryň arasyndaky gatnaşyklara ünsi çekýär. Şunuň bilen baglylykda, ol Aba Annaýew adyndaky Halkara atçylyk akademiýasynyň rektory Pygy Baýramdurdyýewiň ýolbaşçylygydaky wekiliýetiň Doha şäherine saparyny belläp geçýär. Wekiliýetiň agzalary Doha şäherinde geçýän “Emiriň Gylyjy” atly konkur boýunça 13-nji çempionatyň açylyş dabarasyna gatnaşdylar.
Türkmenistan we Katar ýaş hünärmenleri taýýarlamak ulgamynda tagallaryny birleşdirdiler. Arkadag şäherinde ýerleşýän Aba Annaýew adyndaky Halkara atçylyk akademiýasy bilen Kataryň Atly sport döwlet federasiýasynyň arasynda hyzmatdaşlyk pugtalandyrylýar. Federasiýa Şeýh Ahmad bin Nuh Al-Tani ýolbaşçylyk edýär.
ORIENT news
