Hindistanyň iri derman önümçilik kompaniýasy Türkmenistanda şahamçasyny açmak isleýär
Hindistanyň derman önümçiligine ýöriteleşen iri "Sun Pharma" kompaniýasy Türkmenistanda şahamçasyny açmak hem-de lukmançylyk enjamlaryny öndürýän bilelikdäki kärhanany döretmek isleýär. 9-njy fewralda "Sun Pharma" kompaniýasynyň Minsk şäherindäki edarasynda Türkmenistanyň ilçisi Nazarguly Şagulyýew bilen geçirilen duşuşykda bu boýunça gepleşikler geçirildi.
Duşuşyk hindi tarapynyň başlangyjy boýunça, kompaniýanyň Belarusdaky edarasynyň wekili Naraýanar Subramoniýa Aýeriň gatnaşmagynda geçirildi. Taraplar hindi-türkmen söwda-ykdysady hyzmatdaşlygyny işjeňleşdirmegiň çäklerinde özara bähbitli gatnaşyklaryň geljekki ugurlaryny maslahatlaşdylar.
Hindistanyň derman önümçiligi kompaniýasynyň wekili "Sun Pharma-nyň" türkmen bazarynda ornuny berkitmek isleýändigini, munuň üçin saglygy goraýyşyň kardiologiýa, gastroenterologiýa, newrologiýa, ginekologiýa, psihatriýa ýaly ugurlarynda peýdalanylýan lukmançylyk enjamlary bilen üpjün etmäge taýýardygyny aýtdy. Duşuşykda "Sun Pharma-nyň" Türkmenistandaky şahamaçasyny açmak we lukmançylyk enjamlaryny öndürýän bilelikdäki hindi-türkmen kärhanasyny açmak mümkinçilikleri ara alnyp maslahatlaşyldy.
Türkmen ilçisi hindi tarapyna daşary ýurt maýa goýumlary üçin Türkmenistanda döredilen amatly kanunçylyk binýadynyň ýurda daşary ýurt maýa goýumlaryny çekmekde oňyn gurşawy döredýändigini aýtdy. Bu babatda anyk teklipleri ara alyp maslahatlaşmak üçin türkmen ilçisi Hindistanyň derman önümçilik kompaniýasynyň wekillerini Türkmenistana baryp görmäge çagyrdy.
ORIENT news
