Türkmenistan Halkara Deňiz Guramasynyň Bunker konwensiýasyna goşuldy
Halkara Deňiz Guramasy (IMO) Türkmenistanyň Bunker ýangyjy zerarly ýüze çykýan hapalanmadan gelýän zyýanyň 2001-nji ýyldaky raýat jogapkärçiligi baradaky halkara konwensiýasyna goşulmagyny tassyklady (Bunker konwensiýasy, “Bunker 2001”).
Goşulmak boýunça işleri, gämi bunker hyzmatlary üçin halkara talaplaryny ýerine ýetirmek üçin geçirildi. Konwensiýa Türkmenistan üçin 2024-nji ýylyň 23-nji aprelinde güýje girer diýip, Türkmenistan Ministrler Kabinetiniň ýanyndaky Ulag we kommunikasiýalar agentliginiň metbugat gullugy (“Türkmendenizderyayollary”) habar berýär.
Bunker konwensiýasy HDG tarapyndan 2001-nji ýylyň 23-nji martynda kabul edildi we 2008-nji ýylyň 21-nji noýabrynda güýje girdi. Esasy maksady jogapkärçilik meselelerini kesgitlemek we bunker ýangyjy zerarly gelýän hapalanmanyň öwezini dolmak üçin bitewi halkara standartyny we prosedurasyny kabul etmek. Konwensiýa ýangyç dökülmegi netijesinde ýetirilen zyýanyň ýeterlik derejede, çalt we täsirli öwezini dolmagy üpjün edýär.
Häzirki wagtda dünýäniň 100-den gowrak ýurdy, şol sanda Hazarýaka döwletleri - Russiýa Federasiýasy, Azerbaýjan Respublikasy we Eýran Yslam Respublikasy ýaly ýurtlar bu konwensiýa gatnaşýarlar.
ORIENT news
