Parižde geçiriljek Olimpiýa oýunlarynyň medallarynyň aýratynlygy mälim edildi
2024-nji ýylyň 26-njy iýulyndan 11-nji awgusty aralygynda Pariž şäherinde geçiriljek 33-nji Tomusky Olimpiýa oýunlarynyň medallary resmi taýdan tanyşdyryldy.
1896-njy ýylda Afinyda geçirilen ilkinji häzirki zaman Olimpiýa oýunlaryndan bäri gowşurylan, takmynan, 36,600 medaldan tapawutlylykda, Parižde geçiriljek Olimpiýa we Paralimpiýa oýunlarynda ýeňiji bolanlara merkezi Fransiýanyň nyşany bolan Eýfel diňinden alnan altyburç demir bölegi bilen bezelen medallar gowşurylar.
Baýraklaryň dizaýny «Chaumet» fransuz şaý-sepler öýi tarapyndan ýörite Türgenler topary bilen bilelikde işlenip düzüldi.
«Pariž – 2024» oýunlarynyň guramaçylyk toparynyň prezidenti Toni Estangeniň belleýşi ýaly, bu çözgüt medallary özboluşly etmek we tapawutlandyrmak maksady bilen kabul edildi. Şonuň üçin demir bölegi gymmat bahaly daş ýaly, medalyň merkezine berkidildi.
Näme üçin altyburçlyk? Fransuzlar öz ýurtlaryny «altyburçlyk» diýip atlandyrýarlar. Bu at ajaýyp landşaftlary we derýalary bolan ýurduň geografik taýdan adatdan daşary amatly ýerde ýerleşmeginden gelip çykýar, Fransiýa daglar, deňizler we umman bilen gurşalandyr.
Pariždäki Olimpiýa oýunlary 2024-nji ýylyň 26-njy iýulyndan 11-nji awgusty aralygynda, Paralimpiýa oýunlary bolsa 28-nji awgustdan 8-nji sentýabr aralygynda geçiriler.
ORIENT news
