Raşid Meredowyň ýolbaşçylygyndaky türkmen wekiliýeti Tokioda gepleşikleri geçirýär
22-23-nji ýanwarda Türkmenistanyň daşary işler ministri Raşid Meredowyň ýolbaşçylygyndaky türkmen wekiliýeti Ýaponiýa iş saparyny amala aşyrýar.
Saparyň çäklerinde Ýaponiýanyň hökümetinde, Parlamentinde, degişli ministrliklerinde we pudaklaýyn dolandyryş edaralarynda, şeýle-de maliýe we eksport-karz beriş agentlikleriniň, öňdebaryjy ýapon kompaniýalarynyň ýolbaşçylary bilen duşuşyklaryň geçirilmegi meýilleşdirilýär. Bu barada Türkmenistanyň Daşary işler ministrligi habar berýär.
Geçiriljek duşuşyklarda döwletara gatnaşyklary berkitmek, parlament ugry boýunça hyzmatdaşlygy giňeltmek, syýasy-diplomatik işjeňligi artdyrmak, söwda-ykdysady gatnaşyklary ösdürmek, şeýle-de ylym-bilim hyzmatdaşlygy çuňlaşdyrmak bilen bagly meseleleriň giň toplumyna serediler.
2023-nji ýylyň iýun aýynda Ýaponiýanyň Premýer ministri Fumio Kisida ýurduň Daşary işler ministrligine Türkmenistan, Gazagystan, Özbegistan, Gyrgyzystan we Täjigistan döwletleriniň Baştutanlary bilen ýokary derejeli gepleşikler formatyny açmagyň üstünde işlemegi tabşyrjakdygyny aýtdy. Ýaponiýa bilen Merkezi Aziýa ýurtlarynyň arasynda yzygiderli ýokary derejeli duşuşyklarнх şu ýyldan geçirilip başlanmagyna garaşylýardy.
ORIENT news
