Türkmen önüm öndürijileri halkara “Iran Expo” sergisine gatnaşmaga çagyryldy
Türkmenistanyň Söwda-senagat edarasynda bu edaranyň başlygy Mergen Gurdow bilen Eýranyň ilçisi Ali Mojtaba Ruzbahaniniň arasynda duşuşyk geçirildi. Taraplar söwda-ykdysady gatnaşyklary ösdürmegiň we hyzmatdaşlygyň ugurlaryny giňeltmegiň ugurlaryny ara alyp maslahatlaşdylar.
Duşuşykda taraplar ykdysady hyzmatdaşlyk boýunça türkmen-eýran toparlarynyň yzygiderli duşuşyklaryny geçirmek, serhetýaka sebitlerdäki telekeçileriň arasynda çäreleri, bilelikdäki sergileri we ýarmarkalary guramak barada pikir alyşdylar. Bu barada Söwda-senagat edarasynyň metbugat gullugy habar berýär.
Eýranyň ilçisi, türkmen öndürijilerini “Iran Expo” halkara sergisine gatnaşmaga çagyrdy.
“Iran Expo”, kompaniýalara önümlerini eksport etmäge we täze bazarlary öwrenmäge kömek etmegi maksat edinýän halkara söwda çäresidir. Sergi kompaniýalara önümlerini we hyzmatlaryny hödürlemek, hyzmatdaşlary we amatly bazarlary tapmaklary üçin ajaýyp mümkinçilik döredýär.
Bu ýyl sergi 27-nji aprelden 1-nji maý aralygynda Tähranyň halkara sergi merkezinde geçiriler. Eýranyň öňdebaryjy eksportçylaryndan we senagatçylaryndan başga-da, takmynan 70 ýurtdan 1000-den gowrak daşary ýurtly işewür bu çärä gatnaşar we gepleşikler guralar.
ORIENT news
