Ýewropa Komissiýasynyň wise-prezidenti Türkmenistanyň Daşary işler ministrliginde metbugat brifingini geçirdi
Ýewropa Komissiýasynyň wise-prezidenti Margaritis Şinasyň ýolbaşçylygyndaky Ýewropa Bileleşiginiň 15 – 17-nji ýanwarda Merkezi Aziýa döwletlerine bolan saparynyň jemlerine bagyşlanyp, Türkmenistanyň Daşary işler ministrliginde metbugat brifingi geçirildi. Ol Türkmenistana çarşenbe güni gelipdi.
Bu sapar “Ýewropa Bileleşigi-Merkezi Aziýa” maýa goýum forumynyň öňüsyrasynda geçirildi. Onuň maksady sebitleriň arasynda ulag ýollaryny ösdürmek arkaly özara gatnaşyklary ösdürmekden ybaratdyr.
Margaritis Şinas Türkmenistanyň Prezidenti Serdar Berdimuhamedow we Ministrler Kabinetiniň Başlygynyň orunbasary, daşary işler ministri Raşid Meredow bilen duşuşdy.
Duşuşyklarda ÝB-Merkezi Aziýa görnüşindäki hyzmatdaşlyk, Merkezi Aziýa ýurtlarynyň “ÝB-niň Ählumumy derweze” başlangyjyna gatnaşmagy, şeýle hem ýakyn wagtda geçiriljek maýa goýum forumyna Türkmenistanyň gatnaşmagy ýaly möhüm meseleler ara alnyp maslahatlaşyldy.
Şinas Türkmenistanyň Bütindünýä Söwda Guramasyna goşulmak ugrundaky tagallalaryny we köptaraplaýyn söwda ulgamynyň agzasy bolmak islegini goldady. Ol Türkmenistanyň Dubaýda geçirilen “COP28” maslahatynda Ählumumy Metan borçnamasyna goşulandygyny belledi. Mundan başga-da, Ýewropa Komissiýasynyň wise-prezidenti ÝB-niň adam hukuklaryna ygrarlylygy saklamagy esasy ýörelge hökmünde görýändigini nygtady. Şunuň bilen baglylykda, Türkmenistanyň her ýylda geçirilýän adam hukuklary boýunça gepleşiklere gatnaşmagyna ýokary baha berildi. “Iki tarap hem halkara hukugyna we BMG-niň Tertipnamasynda göz öňünde tutulan ýörelgelere hormat goýmagyň, şeýle hem ikitaraplaýyn we halkara gatnaşyklarda güýç ulanmakdan saklanmagyň zerurdygyny nygtady” diýip, Şinas duşuşyklaryň netijeleri barada aýtdy.
Sapardan soň geçirilen metbugat ýygnagynda Margaritis Şinasyň belleýşi ýaly: “Ýewropa Komissiýasynyň döredilen wagtyndan bäri, geçen 5 ýylda bu düzümiň hataryndan Türkmenistana sapar eden ilkinji ýolbaşçydygyma buýsanýaryn. Türkmenistan ÝB-niň Merkezi Aziýadaky esasy hyzmatdaşydyr. Bu sapar Ýewropa Bileleşiginiň dünýädäki hyzmatdaşlar bilen esasy maýa goýum strategiýasy bolan “Ählumumy derweze” başlangyjyny ara alyp maslahatlaşmaga mümkinçilik döretdi. “Ählumumy derweze” strategiýasy özara gyzyklanma bildirilýän ugurlara maýa goýmagy göz öňünde tutup, Merkezi Aziýa döwletleri üçin bähbitlidir. Sebäbi bu sebit Gündogar bilen Günbatar dünýäleriniň arasyndaky derwezedir. Bu sapar Türkmenistan bilen Ýewropa Bileleşiginiň arasynda hyzmatdaşlygy ähli ugurlar boýunça ösdürmäge täze itergi berdi”.
