Programmalaryň saýlawy: Prep4Success
Täzelikler sahypalarynda we sosial mediýada, okuw, talyp hakyny ýa-da tejribe hödürleýän dürli programmalar barada mahabatlar hemişe gözümiziň alnynda görünýär. ORIENT, okyjylaryň şeýle taslamalaryň mazmunyna we peýdalaryna has gowy düşünmegi üçin birnäçe derňewi dowam etdirýär. Şu günki bölümde Siz Halkara bilimi boýunça “Prep4Success” Amerikan geňeşleri programmasy bilen tanyşarsyňyz.
“Prep4Success” (terj. “Üstünlige taýýarlyk”) Halkara bilimi boýunça Amerikan geňeşi tarapyndan amala aşyrylýan bilim programmasydyr. Maksatlaýyn toparyň düzümi, ýokary bilimsiz we institutlaryň, uniwersitetleriň talyplary bolmadyk mekdep uçurymlaryndan ybaratdyr; Bu maksatnama orta hünär bilim edaralarynyň talyplary we uçurymlary üçin hem açykdyr. Iňlis dilini erkin bilmek şeýle-de mekdepdäki ajaýyp akademiki görkezijiler hem zerur şertdir.
Bilim kursy iki derejä bölünýär: Level 1 we Level 2. Arza berijiniň derejesi saýlama synaglary wagtynda kesgitlenýär. Programmany tamamlamak üçin, ikinji derejeli çylşyrymly kursy üstünlikli tamamlamaly. Okuw möwsümi 18 hepde dowam edýär we ABŞ-nyň ýokary okuw mekdeplerine kabul edilmek üçin akademiki taýýarlygyň dürli ugurlary boýunça 7 sagatlyk intensiw sapaklardan ybarat bolup durýar.
Taslama öz adyna doly laýyk gelýär - okuw wagtynda, gatnaşyjylar akademiki okamagy öwrenýärler, standartlaşdyrylan TOEFL we SAT synaglaryna taýýarlyk görýärler, dürli görnüşli düzme ýazmagy öwrenýärler, gözleg işlerini we iş kagyzlaryny ýazmak üçin formatlary we düzgünleri öwrenýärler. Geljekki talyplar akademiki ýazuwdan, okamakdan we synaga taýýarlykdan başga-da, Amerikanyň ÝOM-ne ýüz tutmagyň gurluşyny we strategiýalaryny işjeň öwrenýärler. Taýýarlygyň bu ugurlarynyň hemmesi, uniwersitet okuwynda üstünlik gazanmak üçin berk binýat döredýär, bu gatnaşyjylara talyplyk durmuşyna, ÝOM-niň okuw prosesine ýeňil girişmäge kömek edýär.
Model synaglary okuw möwsümiň dowamynda geçirilýär we okuwyň ahyrynda gutarnykly synag bolýar. “Dersler” boýunça synagdan üstünlikli geçip, taslamany gutaranlar, programmanyň gutarandygy barada şahadatnama we ballar bilen anketa alýarlar.
Umuman alanyňda, her ýyl iki akademiki tapgyrlar bolýar - ýazky we güýzki. Bahardaky tapgyr üçin ýüz tutmalar häzirki wagtda açykdyr. Gatnaşmak üçin anketany ýanyndaky resminamalar bilen (mekdep şahadatnamasynyň skanirlenen göçürmesi, iňlis dilinde maslahat haty, pasportyňyzyň rezýume we skanirlenen nusgasy) saýlama toparynyň e-poçta salgysyna ibermeli: associatep4s@americancouncilstm.org. Saýlawyň ikinji tapgyry, matematika we iňlis dili boýunça synagdyr. Saýlawdan geçen dalaşgärler maksatnama gatnaşýarlar. Okuwlaryň derejesi synag netijelerine baglydyr. Anketanyň möhleti 25-nji ýanwar.
Bu bilen biz, programmalaryň saýlawy tapgyrynyň ikinji sanyny tamamlaýarys. Indiki makalada ORIENT okyjylaryny UNRCCA Öňüni alyş diplomatiýasy boýunça akademiýasynyň programmasy bilen tanyşdyrar. Tapgyryň birinji sanyny şu ýerden tapyp bilersiňiz:
Programmalaryň saýlawy: Technovation Girls.
Saparguly Mahtumow
