Türkmenistan bilen Saud Arabystany 2024-nji ýyldaky haj zyýaraty barada Ylalaşyga gol çekdiler
Şu günler, 8-11-nji ýanwar aralygynda, Saud Arabystanynyň Jidda şäherinde “Haj we umra hyzmatlary” boýunça Halkara maslahaty we sergisi geçirilýär. Bu çäräniň esasy maksady zyýaratçylar üçin has amatly şertleri döretmek, olaryň dini we medeni tejribelerini baýlaşdyrmakdyr.
Maslahata 80-den gowrak ýurtdan wekiliýetler gatnaşýar. Bu maslahata gatnaşýan türkmen wekiliýetine Türkmenistanyň Müftüsi Ýalkap Hojagulyýew ýolbaşçylyk edýär.
Çäreleriň çäginde, 2024-nji ýylda Haj parzyny ýerine ýetirmek barada Türkmenistanyň Müftüsiniň müdiriýeti bilen Saud Arabystany Patyşalygynyň Haj we umra ministrliginiň arasynda ikitaraplaýyn Ylalaşyga gol çekildi. Bu barada Türkmenistanyň Daşary işler ministrliginiň metbugat gullugynda habar berilýär.
Ozal, “Türkmenhowaýollary” agentliginiň 2024-nji ýylyň 16-njy fewralyndan “Aşgabat – Jidda” aralygynda uçuşlary açmagy meýilleşdirýändigi habar berildi.
ORIENT news
