Türkmenistanyň Prezidenti sapar bilen Sankt-Peterburga bardy
Prezident Serdar Berdimuhamedow GDA ýurtlarynyň döwlet Baştutanlarynyň resmi däl sammitine gatnaşmak üçin iş sapary bilen Russiýa Federasiýasyna ugrady. Bu barada Türkmenistanyň Döwlet habarlar agentligi mälim edýär.
Aşgabadyň Halkara howa menzilinde döwlet Baştutanyny resmi adamlar ugratdylar. Birnäçe sagatdan soňra Prezident Serdar Berdimuhamedowyň uçary Sankt-Peterburg şäheriniň «Pulkowo» halkara howa menziline gondy. Bu ýerde Prezident Serdar Berdimuhamedowy resmi adamlar garşyladylar.
GDA döwletleri bilen ikitaraplaýyn we köptaraplaýyn görnüşdäki netijeli hyzmatdaşlyga üýtgewsiz ygrarly ýurdumyz GDA giňişligindäki gatnaşyklaryň pugtalandyrylmagyna, hyzmatdaşlygyň täze many-mazmun bilen baýlaşdyrylmagyna hemmetaraplaýyn ýardam bermäge çalyşýar. Prezident Serdar Berdimuhamedowyň GDA-nyň Sammitlerine yzygiderli gatnaşmagy munuň aýdyň subutnamasydyr.
2024-nji ýylda GDA-da başlyklyk etmek Gyrgyzystandan Russiýa geçiriler. Russiýanyň Arkalaşykda başlyklyk etmeginde geljek ýylda 150 töweregi çäräniň gecirilmegi meýilleşdirilýär. Russiýanyň paýtagtynda geljek ýylyň 8-nji oktýabrynda geçiriljek indiki sammit onuň esasy çäresi bolar.
ORIENT news
