Sebitiň ýurtlary Hazar deňziniň suwunyň çekilmegi bilen bagly Iş toparyny dörederler
Türkmenistanyň wekiliýeti "Hazaryň deňiz giňişligini goramak hakynda" Çarçuwaly konwensiýasynyň çäklerinde döredilen ýörite bilermenler toparynyň birinji mejlisine gatnaşdy. 18-19-njy dekabrda Baku şäherinde geçirilen duşuşyga Hazarýaka döwletleriniň ählisiniň daşary we daşky gurşaw ministrlikleriniň ygtyýarly wekilleri, şeýle hem degişli Konwensiýanyň Sekretariaty bolup hyzmat edýän BMG-niň Daşky gurşaw maksatnamasynyň Ýewropa sebit edarasynyň işgärleri gatnaşdylar. Bu barada "Azertag" habarlar agentligi mälim edýär.
Taraplar Konwensiýanyň Sekretariatyny bu sebitiň bir ýurduna geçirmek bilen bagly institutisional meseleleri ara alyp maslahatlaşdylar. Munuň üçin bilermenlere degişli resminamalary taýýarlaýarlar. Tähran konwensiýasynyň Sekretariatynyň institusional mehanizmleri, şeýle hem Hazar deňziniň suwunyň çekilmegi bilen bagly Iş toparyny döretmek meseleleri maslahatlaşyldy.
Ýörite iş toparyny döretmek baradaky başlangyç Hazarýaka döwletleriniň ekologiýa ministrlikleriniň şu ýylyň 21-22-nji sentýabrynda Şweýsariýanyň Ženewa şäherinde geçiren duşuşygynda kabul edildi.
ORIENT news
