Türkmenistanyň daşary işler ministri HGHK-niň sebit wekili bilen duşuşdy
Ýekşenbe güni, 10-njy dekabrda Türkmenistanyň daşary işler ministri Raşid Meredow bilen Halkara Gyzyl Haç Komitetiniň (HGHK) Merkezi Aziýa boýunça sebit wekilçiliginiň ýolbaşçysy Bilýana Miloşewiçiň arasynda duşuşyk geçirildi.
Söhbetdeşlik wagtynda taraplar ikitaraplaýyn hyzmatdaşlygyň häzirki derejesine baha berdiler we ýurduň hökümeti bilen HGHK-niň arasyndaky özara gatnaşyk meýilnamalaryny kesgitlediler. Şeýle hem söhbetdeşler Komitetiň sebitdäki alyp barýan işlerini ara alyp maslahatlaşdylar we HGHK-niň milli hyzmatdaşlarynyň Halkara ynsanperwerlik hukugynyň (HYH) mümkinçiliklerini artdyrmaga we guramanyň ýaşlara gönükdirilen işjeňliginiň ähmiýetine ünsi çekdiler.
Türkmenistanyň Daşary işler ministrliginiň ýolbaşçysy, ýurtda HYH-ny ösdürmekde özara gatnaşyklaryň oňyn netijelerini, Komitetiň Türkmenistandaky edarasynyň ynsanperwerlik hukuklary babatynda habardarlygy ýokarlandyrmakdaky işjeňligini we HYH-ny milli kanunçylyga goşmak boýunça tagallalarynda milli häkimiýete goldaw berýändigini belledi.
ORIENT habarlary
