Türkmenistan we BAE ýakyn ýyllarda söwda dolanyşygyny iki esse ýokarlandyrmagy maksat edinýärler
Birleşen Arap Emirlikleriniň Türkmenistandaky ilçisi Ahmet Al-Haý Al Hammeli resmi türkmen metbugatynda çap edilen makalasynda Aşgabat bilen Abu-Dabiniň ýakyn ýyllarda söwda dolanyşygyny iki esse artdyrmak isleýändigini aýtdy.
“Ikitaraplaýyn gatnaşyklarymyz ähli derejelerde görlüp-eşidilmedik ösüşi başdan geçirýär. Şeýlelik bilen, 2022-nji ýylda söwda dolanyşygynyň mukdary 49 göterim ösüp, takmynan 1 milliard 300 million dollara (nebit söwdasyny hasaba almanyňda) ýetdi. Biziň maksadymyz ýakyn ýyllarda söwda dolanyşygyny iki esse artdyrmak" diýip, ilçi makalasynda belleýär.
Şu ýyl ýurt yglan edilmeginiň 52 ýyllygyny belleýär. Bu döwürde ýurt Pars aýlagynda iň ösen ykdysady döwletleriň birine öwrülmegi başardy. Ilçi: "BAE halkara bäsdeşlik ukyplylygy babatda ençeme ýyldan bäri öňdeligi eýeläp gelýär we dünýäniň ähli ýurtlarynyň arasynda 186 görkeziji boýunça birinji, 508 görkeziji boýunça Arap dünýäsinde birinji orunda durýar" -diýdi.
Ahmet Al-Haý Al Hammeli iki ýurduň arasyndaky hyzmatdaşlykda şol sanda nebit-gaz pudagynda-da ajaýyp mümkinçilikleriň bardygyny göz öňünde tutup, ikitaraplaýyn gatnaşyklaryň geljegine umytly garaýandygyny aýtdy.
ORIENT news
