Türkmenistan Hazarýaka döwletleriniň daşary işler ministrleriniň duşuşygyna gatnaşdy
Sişenbe güni, 5-nji dekabrda Moskwada Hazarýaka ýurtlarynyň daşary syýasat edaralarynyň ýolbaşçylarynyň duşuşygy geçirildi. Duşuşyga ýurduň daşary işler ministri Raşid Meredowyň ýolbaşçylygyndaky türkmen wekiliýeti hem gatnaşdy.
Meredow ýygnananlara ýüzlenip, aýratyn ünsi toplumlaýyn çemeleşmegi talap edýän iň möhüm meselä, deňiz derejesiniň peselmegine çekdi. Şunuň bilen baglylykda ministr esasy wezipesi Hazar deňzinde suwuň azalmagy bilen baglanyşykly meseleleri jikme-jik öwrenmekden ybarat bolan bäştaraply iş toparyny döretmegiň zerurdygyny aýtdy. Türkmenistanyň daşary işler ministri bu hadysanyň ýaramaz netijeleriniň öňüni almagyň we azaltmagyň möhümdigini belläp, döwletiň degişli hukuk resminamasynyň taslamasyny taýýarlamaga taýýardygyny aýtdy.
Şeýle hem, türkmen wekiliýetiniň ýolbaşçysy Hazarýaka döwletleriň hökümetleriniň arasynda Hazar deňzinde deňiz ylmy gözlegleri pudagyndaky hyzmatdaşlyk baradaky şertnamanyň taslamasy barada ylalaşmak işini tizleşdirmegi teklip etdi.
Deňiz derejesiniň peselmeginden başga-da, Raşid Meredow Hazar deňzinde energetika hyzmatdaşlygynyň hem möhüm meseledigini belledi. Ýurduň daşary syýasat edarasynyň ýolbaşçysy bu ugurdaky esasy faktoryň, kenarýaka ýurtlaryň ykdysady zerurlyklaryny kanagatlandyrýan Hazar deňziniň suwasty infrastrukturasynyň gurluşygynda taraplaryň hukuklaryny kadalaşdyrýan Hazar deňziniň hukuk ýagdaýy baradaky konwensiýanyň 14-nji maddasynyň durmuşa geçirilmegi bolup durýandygyny aýtdy. Ministr bu meseläniň Ýewraziýa yklymynda energetika howpsuzlygyny üpjün etmek üçin möhüm şert bolup hyzmat edýändigini belläp geçdi.
Duşuşyga gatnaşyjylar geçen tomusda türkmen paýtagtynda geçirilen VI Hazar sammitiniň ylalaşyklaryna laýyklykda ekologiýa pudagynda ýakyn hyzmatdaşlyga taýýardyklaryny tassykladylar. Şeýle hem Türkmenistanyň Prezidenti tarapyndan öňe sürlen “Hazar daşky gurşaw başlangyjynyň” ähmiýeti hem nygtaldy.
Duşuşygyň ahyrynda Hazarýaka döwletleriniň Daşary işler ministrleriniň umumy Beýannamasy kabul edildi.
ORIENT news
