Benin Respublikasynyň ilçisi Türkmenistanyň Daşary işler ministrliginde ynanç hatlarynyň nusgalaryny gowşurdy
Türkmenistanyň daşary işler ministriniň orunbasary Berdinyýaz Mätiýew Benin Respublikasynyň Türkmenistandaky täze ilçisi (ýerleşýän ýeri Moskwada) Akambi Andre Okunlola-Biaudan ynanç hatlarynyň nusgalaryny kabul etdi.
Mätiýew diplomaty bu wezipä bellenilmegi bilen gutlady we munuň Türkmenistan bilen Beniniň arasyndaky gatnaşyklaryň ösmegine itergi berjekdigine ynam bildirdi.
Taraplar BMG, EKOSOS we beýleki halkara guramalaryň çäginde iki ýurduň arasyndaky utgaşdyrylan hyzmatdaşlygyň geljegine göz aýladylar we Türkmenistan bilen Benin Respublikasynyň Daşary işler ministrlikleriniň arasynda syýasy geňeşmeleri guramak, ikitaraplaýyn söwda we ykdysady gatnaşyklary ýola goýmak we ösdürmek barada pikir alyşdylar şeýle hem medeni-ynsanperwer ugurda hyzmatdaşlygy ýola goýmagyň möhümdigini belläp geçdiler.
Benin Atlantik ummanynyň Gwineýa aýlagynyň kenarynda ýerleşýär. Paýtagty Porto-Nowo şäheridir, ýöne ýurduň ykdysady merkezi Günbatar Afrikanyň üstaşyr söwda ulgamynda möhüm baglanyşyk bolan port şäheri Kotonudyr. Ýurt pagta, nohut, palma ýagy, mekgejöwen we ananas eksport edýär. Benin elektrik energiýasynyň importyna 90%, energiýa çeşmeleriniň importyna bolsa 100% baglydyr.
ORIENT news
