Türkmenistan TRASEKA-nyň Hökümetara geňeşiniň hemişelik sekretariatynyň mejlisine gatnaşdy
Türkmenistan ilkinji gezek 5-nji dekabrda Gruziýanyň paýtagty Tbiliside geçirilen TRASEKA-nyň Hökümetara geňeşiniň hemişelik sekretariatynyň mejlisine gatnaşdy.
Hemişelik sekretariatyň Baş sekretary Aset Asawbaýew we beýleki agzalar Ýewropa Bileleşigine agza we hyzmatdaş ýurtlaryň arasynda hyzmatdaşlygy pugtalandyrmak bilen “Ýewropa - Kawkaz - Aziýa” ulag geçelgesi halkara hyzmatdaşlyk maksatnamasyna goşulmagy bilen Türkmenistany gutladylar. Şeýlelikde bu Maksatnama gatnaşýan döwletleriň sany 14-e ýetdi.
Mejlise Türkmenistany Ministrler Kabinetiniň ýanyndaky Ulag we kommunikasiýalar agentligini Baş direktorynyň orunbasary Batyr Annaýew gatnaşdy. Onda halkara hyzmatdaşlygynyň häzirki ýagdaýy, hususan-da, multimodal ulag meseleleri ara alnyp maslahatlaşyldy.
2016-2026-njy ýyllar üçin “Ýewropa - Kawkaz - Aziýa” halkara ulag geçelgesini ösdürmek boýunça Hereketler meýilnamasynyň durmuşa geçirilmegi we halkara TRASEKA şertnamasyna goşulmak, bu ulag geçelgesi boýunça halkara awtoulag daşamalaryň rugsat ulgamynyň netijelerine we bu ugur boýunça geçirilen ýükleriň jemlerine garaldy.
Duşuşygyň gün tertibinde Demir ýollary hyzmatdaşlyk guramasy bilen TRASEKA-nyň Hökümetara geňeşiniň hemişelik sekretariatynyň arasyndaky hyzmatdaşlyk Ähtnamasynyň taslamasy, TRASEKA-nyň Işewürlik geňeşiniň esasy düzgünleri we bu düzümiň 17-nji mejlisine taýýarlyk we beýleki guramaçylyk meseleleri ara alnyp maslahatlaşyldy.
ORIENT news
