ÝB-niň ýaryşlarynda Merkezi Aziýadan bolan ýeňijiler Latwiýanyň energiýa netijeliligini öwrenýärler
Talyplar, ýaş alymlar we hünärmenler, şeýle hem Merkezi Aziýa ýurtlaryndan iň köp energiýa tygşytlaýan mekdepleriň wekilleri “Energiýa netijeliligini ýokarlandyrmak - Latwiýanyň tejribesi” atly okuw sapary bilen Latwiýa bardylar. Ýewropa Bileleşiginiň çakylygy boýunça bu çärä Gazagystanyň, Gyrgyzystanyň, Täjigistanyň, Türkmenistanyň we Özbegistanyň 12 wekili gatnaşdy. Olar ÝB-niň Türkmenistandaky wekiliýetiniň metbugat we maglumat bölüminiň sahypasynda habar berlişi ýaly, ÝB-niň “#Reels4SustainableEnergy” we iň oňat durnukly energetika Mural Dizaýn ýaryşlarynyň ýeňijileri, şeýle hem Merkezi Aziýanyň paýtagtlaryndaky umumy bilim berýän mekdepleriň arasynda “Iň köp energiýa tygşytlaýan mekdep” adyna dalaşgär görkezilen mekdepleriň wekilleridir.
2023-nji ýylyň 27-nji noýabryndan 1-nji dekabry aralygynda ÝB tarapyndan maliýeleşdirilýän “Merkezi Aziýada Durnukly energiýa birikmesi” (SECCA) taslamasy tarapyndan gurnalan gözleg sapary Latwiýanyň döwlet we hususy pudaklar tarapyndan durmuşa geçirilýän energiýa netijeliligini we tygşytlylygynyň üstünlikli mysallaryny görkezýär.
SECCA-nyň esasy hünärmeni hanym Ilze Purina gatnaşyjylara: “Daşky gurşaw we howa çärelerine has köp ýaşlaryň gatnaşýandygyny görmek gaty gowy zat. Bu okuw saparyny guramakdaky esasy maksadymyz, ýaşlara ýaşyl energiýa geçmek üçin täze bilimleri we endikleri edinmegi öwredýän ýaşlary we adamlary goldamakdyr. Bu tejribe, işleriňizi we gözlegleriňizi dowam etdirer we şeýlelik bilen ýurtlaryňyzyň durnukly geljegine goşant goşar diýip umyt edýärin” diýip, ýüzlendi.
Saparyň dowamynda gatnaşyjylar Latwiýanyň Ykdysadyýet ministrligi, Riga energetika agentligi, Riga sanly agentligi, Riga tehniki uniwersiteti, Çagalar we ýaşlar uniwersiteti, Geljekki inženerler uniwersiteti, energiýa tygşytlylygynyň Electrum merkezi boýunça hünärmenler we bilermenleri bilen duşuşdy. Ýer eýesi guramalary, binanyň durkuny täzelemek, durnukly gurluşyk, çeşmeleriň tygşytlylygy, jemgyýetiň gatnaşmagy, talyplary taýýarlamak we innowasiýa işlerine gatnaşmak ýaly dürli çäreler arkaly energiýa netijeliligini ýokarlandyrmak boýunça şeýle hem başlangyç üçin goldaw tejribelerini hödürlediler.
ORIENT news
