Türkmenistanyň kompaniýalary Tähranda geçiriljek "EURASIA EXPO-2023" sergisine çagyryldy
4 - 7-nji dekabrda Eýranyň paýtagty Tähranyň Merkezi sergi toplumynda 2- nji "EURASIA EXPO-2023" atly halkara sergisi geçiriler. Bu gözden geçirilişe Türkmenistanyň, Russiýa Federasiýasynyň, Pakistanyň, Yragyň, Kuweýtiň, Bahreýniň, Omanyň, Türkiýäniň, BAE-niň, Saud Arabystanynyň, Hytaýyň, Hindistanyň, Singapuryň, Wýetnamyň, Azerbaýjanyň, Belarusyň, Özbegistanyň, Ermenistanyň, Gazagystanyň, Gyrgyzystanyň we Täjigistanyň wekiliýetleriniň gatnaşmagyna garaşylýar.
Sergide ýangyç-energetika toplumyna, agrosenagat, maşyn gurluşygy, ulag- logistika, maglumat tehnologiýasy, syýahatçylyk pudaklary ýaly ugurlara degişli önümler we hyzmatlar tanyşdyrylar.
Serginiň çäginde GDA ýurtlarynyň, Ýewraziýa ykdysady bileleşiginiň, ŞHG-niň we Pars aýlagy döwletleriniň işewür wekilleriniň arasynda ikitaraplaýyn işewürlik duşuşyklary geçiriler.
Şu günler Eýranyň Maşat şäherinde azyk we syýahatçylyk pudagyna bagyşlanan “STAR EXPO 2023” atly sergisi geçirilýär. Onda Türkmenistanyň Baş konsullygy özüniň sergi bölüminde amaly-haşam we sungat eserlerini, saz gurallaryny we milli lybaslary görkezýär.
ORIENT news
