Türkmen ýaşlarynyň şu ýylda gazanan üstünlikleri köpugurly sergide we maslahatda beýan ediler
Dekabr aýynyň ahyrynda ýylyň dowamynda ýurdumyzda hem-de daşary ýurtlarda geçirilen halkara sport ýaryşlarynda, mekdep okuwçylarynyň olimpiadalarynda, talyp ýaşlaryň bäsleşiklerinde ýeňiji bolanlaryň, şeýle hem ykdysadyýetiň dürli ugurlarynda zähmet çekip, Diýarymyzyň ösüşine mynasyp goşant goşan ýaşlaryň gazanan üstünlikleriniň jemine bagyşlayp, ýaşlaryň dabaraly maslahaty we sergisi geçiirler.
Bu barada Ministrler Kabinetiniň penşenbe güni geçirilen mejlisinde mälim edildi.
Maslahata we köpugurly sergä ata Watanymyzyň ösüşine, onuň at-abraýynyň has-da belende galmagyna mynasyp goşantlaryny goşýan ýaşlarymyz gatnaşarlar. Bu dabara ýurdumyzda geçirilen halkara ýaryşlarda ýeňiji bolan daşary ýurtly türgenleri, tälimçileri hem-de beýleki ugurlar boýunça ýeňiş gazanan ýaşlary hem çagyrmak gerek. Geçiriljek maslahatda we sergide ýaşlaryň gazanan üstünlikleri, ylmy açyşlary öz beýanyny tapmalydyr diýip, Prezident Serdar Berdimuhamedow aýtdy hem-de dabaraly maslahatyň dowamynda ýaşlaryň alyp baran işlerine, gazanan netijelerine mynasyp baha beriljekdigini, olary sylaglamak bilen, geljekki uly üstünliklere ýol açyljakdygyny nygtady.
ORIENT news
